बैशाख २० धनगढी । कैलाली जिल्लाका विभिन्न स्थानबाट प्रहरीले भारतबाट अवैध रूपमा भन्सार छलि गरी ल्याइएका मल तथा विषादीजन्य सामानहरु बरामद गरेको छ । भजनी नगरपालिका वडा नम्बर–३ थेकिपुर र टिकापुर नगरपालिका वडा नम्बर–६ भर्तापुरबाट प्रहरीले ३७ हजार ५ सय रुपैयाँ बराबरको युरिया मल तथा तरकारीमा प्रयोग हुने विषादीजन्य सामानहरु बेवारिसे अवस्थामा बरामद गरेकोे हो ।
जिल्ला प्रहरी कार्यालय कैलाली मातहतका विभिन्न इकाइबाट खटिएको गस्ती टोलीले शनिबार उक्त सामानहरु फेला पारी आवश्यक प्रक्रिया पूरा गरी नियन्त्रणमा लिएको प्रहरीले जानकारी गराएको हो । प्रहरीले उक्त सामान कसले ल्याएको हो भन्ने विषयमा थप अनुसन्धान गरीरहेको जनाएको छ ।
त्यसैगरी कञ्चनपुर जिल्लाका विभिन्न स्थानबाट पनि प्रहरीले भन्सार छलि गरी ल्याइएका विभिन्न उपभोग्य सामग्री बरामद गरेको छ । बेलौरी नगरपालिका वडा नम्बर–१ खल्ला, वडा नंम्बर २ बैजुडाँडा र वडा नम्बर ६ भुराकोट क्षेत्रबाट करिब २ लाख १३ हजार २ सय २० रुपैयाँ मूल्य बराबरका सामानहरू बेवारिसे अवस्थामा फेला पारि प्रहरीले बरामद गरेको हो ।
चिनी, दूध पाउडर, सिरप, सुर्ती, खानेतेल, चियापत्ती, पानीपुरी, पटाका, पेय पदार्थ तथा प्लास्टिक झिल्ली लगायतका सामानहरु बरामद गरिएको हो । जिल्ला प्रहरी कार्यालय कञ्चनपुर मातहतका गस्ती टोलीले शनिबार उक्त सामानहरु नियन्त्रणमा लिएको प्रहरीले जनाएको छ । प्रहरीले दुबै जिल्लामा बरामद गरिएका सामानहरु कसले ल्याएको हो भन्ने विषयमा अनुसन्धान भईरहेको जानकारी गराएको छ ।
