बैशाख २० धनगढी । विश्व प्रेस स्वतन्त्रता दिवसको अवसरमा धनगढीमा ऐक्यबद्धता ¥याली निकालीएको छ । आइतबार नेपाल पत्रकार महासंघ जिल्ला शाखा कैलालीको आयोजनामा ‘शान्तिपूर्ण भविष्यको निर्माण ः मानव अधिकार विकास र सुरक्षाका लागि प्रेस स्वतन्त्रताको प्रवद्र्धन’ भन्ने मूल नारासहित ¥याली निकालिएको हो ।
¥यालीमा विभिन्न सञ्चार माध्यममा आवद्ध पत्रकार तथा सरोकारवालाहरूको सहभागिता रहेको थियो । कार्यक्रम पछि आयोजित सभामा बोल्दै नेपाल पत्रकार महासंघ कैलालीका पूर्व अध्यक्ष तथा सुदूरपश्चिम संयोजक मनमोहन स्वाँरले पत्रकारहरूको हकहित र पेशागत सुरक्षाका लागि एकजुट भएर सशक्त रूपमा अघि बढ्नु पर्ने आवश्यकता रहेको बताए । प्रेसमाथि देखिएका चुनौतीहरूलाई सबै पत्रकार मिलेर सामना गर्नुपर्ने उनले बताए ।
त्यसैगरी इन्सेकका प्रदेश संयोजक खड्कराज जोशीले लोकतन्त्रमा प्रेस स्वतन्त्रताको महत्वपूर्ण भूमिका रहेको बताउदै कुनै पनि बहानामा यसलाई नियन्त्रण गर्ने प्रयास स्वीकार्य नहुने बताए । राष्ट्रिय मानव अधिकार आयोग सुदूरपश्चिम प्रदेशका अधिकृत विदेशराम चौधरीले अभिव्यक्ति स्वतन्त्रता कुण्ठित गर्ने गतिविधि अस्वीकार्य रहेको बताए ।
त्यसैगरी, नेपाल पत्रकार महासंघका केन्द्रीय सदस्य योगेन्द्र बलायरले पछिल्लो समय प्रेस स्वतन्त्रता हननका घटनाहरू बढ्दै गएको बताउदै सञ्चारकर्मीहरूलाई आचारसंहितामा आधारित रहेर काम गर्न आग्रह गरे । कार्यक्रममा महासंघ कैलालीका अध्यक्ष श्रवण देउवाले पत्रकारहरूको हकहितको पक्षमा महासंघ सधैं उभिँदै आएको बताउदै वर्तमान सरकारले प्रेसमाथि चुनौती थपिरहेको बताए । उनले पत्रकारहरूलाई सामूहिक रूपमा एकजुट हुन समेत आग्रह गरे ।
