बैशाख ०२ बैतडी । बैतडीको पाटन नगरपालिका वडा नम्बर ६ स्थित सुर्नयागाड जलविद्युत आयोजनाबाट दुई वर्ष देखि विद्युत उत्पादन बन्द भएको छ । स्थानीयस्तरमा जलविद्युत् आयोजनाको प्राबिधिक व्यवस्थापन गर्न नसक्दा सुर्नयागाड जलविद्युत आयोजनाबाट विद्युत उत्पादन बन्द भएको हो । आयोजनाको एडीआर प्रणालीमा समस्या आएपछि विद्युत उत्पादन बन्द भएको विद्युत प्राधिकरण बैतडी वितरण केन्द्रले जनाएको छ ।
विद्युत प्राधिकरण बैतडी वितरण केन्द्रका अनुसार, सुर्नयागाड जलविद्युत आयोजनाबाट एक सय किलोवाट विद्युत उत्पादन हुँदै आएको भएपनि बीचमा प्राबिधिक समस्या आएका कारण सुर्नयागाड जलविद्युत आयोजनाबाट विद्युत उत्पादन बन्द भएको हो । एक सय किलोवाट विद्युत उत्पादन गर्दै आएको उक्त विद्युतको एडीआर प्रणालीमा समस्या आएकाले विद्युत उत्पादन बन्द भएको नेपाल विद्युत प्राधिकरण बैतडी वितरण केन्द्रका प्रमुख अषेश्वर शाहले जानकारी गराए ।
यस अघी २ सय किलोवाट क्षमताको सुर्नयागाड जलविद्युत आयोजना २०७९ जेठदेखि बन्द रहेको थियो । २०८० माघदेखि एक सय किलोवाट विद्युत उत्पादन शुरु गरिएको भएपनि विद्युत प्रणालीमा समस्या आएपछि फेरि बन्द भएको हो । २०७९ जेठ १४ गतेदेखि पूर्ण रुपमा बन्द रहेकोमा विद्युत गृहले मर्मत गरी सञ्चालन गर्नका लागि विद्युत प्राधिकरणको आयोजना विकास विभाग र विद्युत वितरण केन्द्र बैतडीको प्राविधक टोलीले स्थलगत अनुगमन समेत गरेको थियो ।
२ सय किलोवाट क्षमताको सुर्नयागाड जलविद्युत आयोजना पूर्ण रुपमा बन्द रहेकाले त्यसलाई सञ्चालन गर्नका लागि पहल शुरु गर्न उक्त स्थलगत अनुगमन गरिएको भएपनि आयोजनाको नहर र अन्य संरचना सहित प्राबिधिक सिस्टममा समस्या आएपछि सुर्नयागाड जलविद्युत आयोजना बन्द भएको केन्द्र प्रमुख शाहले बताए । सुर्नयागाड जलविद्युत आयोजना संचालन गर्न तत्काल मर्मत गर्न सकिने अवस्था नरहेको उनले बताए । नहर मर्मत गरेर बन्द रहेको आयोजना सञ्चालनमा ल्याउनका लागि पहल गरिने उनले बताए ।
तत्काल आयोजना सञ्चालनका बिषयमा पहल गर्ने बताउदै उनले पूर्ण क्षमतामा सञ्चालनका लागि चमेलिया जल विद्युत आयोजना संग समन्वय गरेर प्राविधिक टोलीले अध्ययन गर्ने बताए । सुर्नयागाड जलविद्युत आयोजनाबाट केहि बर्षदेखि विद्युत उत्पादन बन्द भएकाले उपकरणहरुमा समेत समस्या हुन सक्ने उनले बताए । केहि उपकरणमा पुर्ण समस्या आएकाले प्राबिधिक टोलिको अध्ययन पछि उपकरणले साथ दिएमा पुर्ण उत्पादनका लागि पहल हुने विद्युत वितरण केन्द्र बैतडीका प्राबिधिक प्रमुख माधव प्रसाद लेखकले बताए ।
विद्युत गृहको मर्मत गरी सञ्चालन गर्नका लागि विद्युत प्राधिकरणको आयोजना विकास विभाग र विद्युत वितरण केन्द्र बैतडीको प्राविधक टोलीले गरेको स्थलगत अनुगमन प्रतिवेदन अनुसार आयोजना सञ्चालनका बिषयमा काम अघि बढ्ने बताइएको छ । बैतडीको सुर्नया नदीमा सञ्चालित अधिकांश लघु जलविद्युत आयोजना बन्द रहेका छन् ।
आयोजना बन्द हुँदा दुर्गम बस्तीका नागगरिक अन्धकारमै बस्न बाध्य भइरहेकाले दुई सय किलोवाटको सुर्नयागाड जलविद्युत सञ्चालनमा आए सहज हुने विद्युत वितरण केन्द्र पाटनका युनिट इन्चार्ज अर्जुन ऐरीले बताए । पछिल्लो समय प्राबिधिक व्यवस्थापनको अभाव लगायतका समस्याका कारणले जिल्लाभरिका लघुजलविद्युत् आयोजना धमाधम बन्द हुँदै गएको उनले बताए ।
