चैत्र १० धनगढी । कैलालीको दुर्गम क्षेत्र मोहन्याल गाउँपालिकामा एक जना महिलाले स्वास्थ्य केन्द्र पुग्न नपाउँदै बाटोमै शिसु जन्माएकी छिन् । मोहन्याल गाउँपालिका वडा नम्बर–३ बुढीआमकी २२ वर्षीया दुर्गा बिकले स्वास्थ्य केन्द्र पुग्न नपाउँदै बाटोमै शिसु जन्माएकी हुन ।
सोमबार सुत्केरी व्यथा सुरु भएपछि परिवारले उनलाई फल्लेबिसौँना आधारभूत स्वास्थ्य केन्द्रतर्फ लैजाँदै गर्दा बाटोमा पर्ने जंगलमै उनले शिशुलाई जन्म दिएकी हुन ।
घटनाबारे जानकारी पाएपछि स्वास्थ्य केन्द्रकी अनमी रूपा खत्री सहितको टोली एम्बुलेन्स लिएर तत्काल घटनास्थल पुगेर आमा र नवजात शिशुको उद्धार गरी आवश्यक प्राथमिक उपचार प्रदान गरिएको हो ।
स्वास्थ्य केन्द्रमा सामान्य हेरचाह पछि आमा र शिशु दुवैको अवस्था सामान्य रहेको पुष्टि भए पछि उनीहरूलाई डिस्चार्ज गरिएको छ । दुर्गम क्षेत्रमा स्वास्थ्य सेवा पहुँचको अभावका कारण अझै पनि महिलाहरूले बाटोमै बच्चालाई जन्म दिनु परेको अवस्था रहेको छ ।
