माघ २८ धनगढी । केलालीका विभिन्न स्थानबाट खैरो हेरोइन जस्तो देखिने लागूऔषध सहित तीन जनालाई प्रहरीले पक्राउ गरेको छ । मंगलबार साँझ र राती छुट्टाछुट्टै स्थानमा खटिएको प्रहरी टोलीले तीन जनालाई पक्राउ गरेको हो ।
कैलालीको टिकापुर नगरपालिका वडा नम्बर–९ खक्रौलाबाट ३ ग्राम ९ सय ५० मिलिग्राम खैरो हेरोइन जस्तो देखिने धुलो पदार्थ सहित लम्कीचुहा नगरपालिका वडा नम्बर–१ बस्ने २८ वर्षीय सन्तोष खत्रीलाई प्रहरीले पक्राउ गरेको हो ।
प्रहरी चौकी कालाकुण्डाबाट खटिएको टोलीले शंका लागी चेकजाँच गर्दा उनको साथबाट उक्त पदार्थ फेला पारेको जानकारी गराएको छ । त्यसैगरी गोदावरी नगरपालिका वडा नम्बर–२ अत्तरिया स्थित बसपार्कबाट ५ सय ६० मिलिग्राम खैरो हेरोइन जस्तो देखिने पदार्थ सहित दार्चुला जिल्ला, लेकम गाउँपालिका वडा नम्बर–४ बस्ने २८ वर्षीय राजेन्द्र पाललाई प्रहरीले पक्राउ गरेको छ ।
लागूऔषध कारोबार भइरहेको भन्ने विशेष सूचनाको आधारमा इलाका प्रहरी कार्यालय मालाखेतीबाट खटिएको प्रहरी टोलीले चेकजाँचका क्रममा उनको साथबाट उक्त पदार्थ बरामद गरेको हो । त्यसैगरी, लम्कीचुहा नगरपालिका वडा नम्बर–३ चिसापानीबाट २ सय २० मिलिग्राम खैरो हेरोइन जस्तो देखिने पदार्थ सहित भारतको उत्तराखण्ड प्रदेश, चम्पावत जिल्ला, पूर्णागिरी नगरपालिका बनबासा बस्ने ३० वर्षीय हर्दिप चन्दलाई प्रहरीले पक्राउ गरेको छ ।
इलाका प्रहरी कार्यालय चिसापानीबाट खटिएको टोलीले पूर्व–पश्चिम राजमार्ग अन्तर्गत महेन्द्रनगरबाट नेपालगञ्जतर्फ जाँदै गरेको डीएल ६ एसबिसी ५१०० नम्बरको मोटरसाइकलमा सवार उनलाई चेकजाँच गर्दा उक्त पदार्थ भेटिएको प्रहरीले जनाएको हो । पक्राउ गरिएका तीनै जनामाथि लागूऔषध सम्बन्धी कसुरमा आवश्यक अनुसन्धान भइरहेको प्रहरीले जनाएको छ ।
