बैशाख ३१ धनगढी । सुदूरपश्चिम प्रदेश सरकारको उद्योग पर्यटन वन तथा वातावरण मन्त्रीका लागि कैलाश चौधरीको नाम सिफारिस भए पछि नागरिक उन्मुक्ति पार्टी भित्र मतभेद देखिएको छ । मंगलबार बसेको नाउपा संसदीय दलको बैठकले मन्त्रीको लागि केन्द्रीय समितिसँग रायसहितको सिफारिस माग गर्ने निर्णय गरी पत्रचार गरेको थियो ।
सोही पत्रको आधारमा पार्टी अध्यक्ष रञ्जिता श्रेष्ठले कैलाश चौधरीको नाम सिफारिस गरी संसदीय दललाई पठाएकी थिइन् । पार्टी अध्यक्ष श्रेष्ठले कैलाश चौधरीलाई मन्त्री बनाउनको लागि पठाएको निर्देशनात्मक सिफारिस पत्रले मतभेद गरेको हो । नाउपाभित्र कैलाश चौधरी पार्टी अध्यक्ष श्रेष्ठ निकट मानिन्छन् । उनी सुदूरपश्चिम संसदीय दल भित्र अल्पमतमा छन् ।
७ जना प्रदेश सभा सदस्य मध्ये पार्टी संरक्षक रेशमलाल चौधरी निकट संसदीय दलका नेता घनश्याम चौधरी सहित ५ जना रहेका छन । बाँकी २ जना श्रेष्ठ निकट देखिएका छन । रेशम पक्षधर सांसदहरु नयाँ तथा जिम्मेवारी नपाएका सांसदलाई मन्त्रीको लागि पठाउनुपर्ने अडानमा रहेका छन् । कैलाश चौधरी यसअघि दुई पटक मन्त्री बनिसकेका छन् ।
समाचार तयार गर्दासम्म नाउपा संसदीय दलले ठोस निर्णय गर्न नसकेको पाइएको छ । दलका नेता घनश्याम चौधरीले बहुमत सदस्यको निर्णय अनुसार मन्त्रीको लागि मुख्यमन्त्री कार्यालयलाई पत्रचार गर्ने बताए । मुख्यमन्त्री कमल बहादुर शाहले नाउपा संसदीय दलको पत्र आफू कहाँ नआएको बताउका छन ।
मुख्यमन्त्री शाहको सचिवालयले नाउपा संसदीय दलको औपचारिक रुपमा पत्र प्राप्त भइसकेपछि शपथ ग्रहणको तयारी थालिने जनाएको छ । यसअघि मुख्यमन्त्री शाहको सचिवालयले पत्र प्राप्त भएको र आजै मन्त्रीको शपथ हुने बताएको थियो । सुदूरपश्चिम सरकारमा नाउपाको भागमा उद्योग पर्यटन वन तथा वातावरण मन्त्रालयको जिम्मेवारी हो ।
विवादित अडियो प्रकरणमा नाउपाबाट उद्योग पर्यटन वन तथा वातावरण मन्त्री बनेका लक्ष्मण किशोर चौधरीले चैत्र १६ गते राजीनामा दिएका थिए । उनको राजीनामा दिएको डेढ महिना सम्म पनि नाउपाले अर्को मन्त्री पठाउन सकेको थिएन । मन्त्री नहुँदा उक्त मन्त्रालयको कामकाज प्रभावित भएको थियो ।
