चैत्र १७ धनगढी । विवादीत अडियो सार्वजनिक भएपछि उद्योग पर्यटन वन तथा वातावरण मन्त्री लक्ष्मणकिशोर चौधरीले पदबाट राजीनामा दिएपछि नागरिक उन्मुक्ति पार्टी(नाउपा) की अध्यक्ष रञ्जिता श्रेष्ठ चोधरी धनगढी आई पुगेकी छिन ।
मन्त्री चौधरीले पदबाट राजीनामा दिएको भोलिपल्ट पार्टी अध्यक्ष रञ्जिता श्रेष्ठ धनगढी आइपुगेकी हुन् । ससुरा समेत पर्ने प्रतिनिधिसभा सदस्य लालबिर चौधरी र टीकापुर नगरपालिकाका मेयर रामलाल डगौरासँगै धनगढी पुगेकी श्रेष्ठले प्रदेश सभा सदस्यहरुसँग आन्तरिक छलफल भईरहेको बताईएको छ ।
धनगढीको एक होटलमा छलफलमा जुटेकी नाउपाकी अध्यक्षलाई भेट्न प्रदेश संसदीय दलका नेता घनश्याम चौधरी, पूर्वमन्त्री समेत रहेका प्रदेश सभा सदस्य रामेश्वर चौधरी, टिका थापा त्यहाँ पुगेको स्रोतले जनाएको छ ।
छलफलमा सहभागी एक जना नेताका अनुसार अध्यक्ष श्रेष्ठले पदबाट राजीनामा दिएका लक्ष्मणकिशोरको ठाउँमा सरकारमा कसलाई पठाउने र चौधरीमाथि पार्टीले कस्तो खालको कारवाही गर्ने भन्ने विषयमा छलफल भइरहेको छ ।
दीगो वन व्यवस्थापन सम्बन्धी कार्यविधी आफू अनुकुल बनाएर ठूलो आर्थिक लाभ लिन सकिने विषयमा काठ व्यवसायी र सचिवालयका कर्मचारीसँग गोप्य छलफल गरेको अडियो सार्वजनिक भए पछि मन्त्री लक्ष्मणकिशोर चौधरीले शनिबार पदबाट राजीनामा दिएका थिए ।
