चैत्र १५ धनगढी । नेपाल कम्युनिष्ट पार्टी एकीकृत समाजवादी (नेकपा एस) सुदूरपश्चिम प्रदेशको अध्यक्षका लागी ४ जना नेताहरुले दौडधुप गरिरहेका छन । चैत्र १७ र १८ गते धनगढीमा हुन गईरहेको प्रथम प्रदेश अधिवेशनले सुदूरपश्चिम प्रदेशको नेतृत्व चयन गर्ने भएकाले अध्यक्षका लागी ४ जना नेताहरुले दौडधुप गरिरहेका हुन ।
प्रदेशको नेतृत्व देखि केन्द्रिय सदस्य तथा पोलिट्ब्यूरो सम्म प्रदेश पार्टी नेतृत्वका लागी डोटीका हर्क बहादुर सिहं, कैलालीका दीर्घ सोडारी, कञ्चनपुरका लाल बहादुर खड्का र कैलालीकै सुरेन्द्र मान कार्कीले दौडधुप गरिरहेका हुन । हालसम्म कसैको पक्षमा नखुलेका हर्क बहादुर सिहंले हालको नेतृत्व पनि सम्हालेका छन् । उनले फेरी एक पटक पार्टी नेतृत्व लिन चाहेका छन ।
त्यस्तै पार्टी प्रदेशको उप सचिव देखी पोलिट्ब्युरो सदस्य समेत भएका पूर्व मुख्यमन्त्री दीर्घ बहादुर सोडारी पनि अध्यक्षको दौडधुपमा छन् । त्यसैगरी पार्टी केन्द्रिय सदस्य एवं पूर्व मन्त्री लाल बहादुर खड्का र पार्टी कार्यालय सचिव सुरेन्द्र मान कार्की समेत अध्यक्षका लागी लबिङमा छन् ।
हर्क बहादुर सिहं कुनै गुटमा नखुले पनि दीर्घ बहादुर सोडारी पार्टी महासचिव घनश्याम भुषाल निकट मानिन्छन् । लाल बहादुर खड्का अध्यक्ष माधव नेपालसगैं महासचिव भुषालसगं समेत ठिक्कको सम्बन्ध बनाएका नेता हुन् भने सुरेन्द्र मान कार्की केन्द्रका नेताहरुसगं ठिक्कको सम्बन्ध राखेर सुदुरपश्चिममा सबैले मन पराउने पात्र हुन् । सुदूरपश्चिममा अध्यक्ष माधव कुमार नेपालको गुट चलाउने सचिव शेर बहादुर कुँवर हुन्, भने घनश्याम भुषालको गुट दीर्घ सोडारी लगायतले चलाउने गरेका छन् ।
नेतासगैं युवा सघंका पूर्व अध्यक्ष समेत रहेका पूर्व मन्त्री नरेश शाहीले घनश्याम भुषाल र झलनाथ खनाल निकटका युवाहरुको टिम चलाउने गरेका छन् । शाही युवा माझँ लोकप्रिय नेता हुन् । समाजवादी भित्र नेता प्रत्येक गुट बन्दा नयाँ नेतृत्व चयन प्रक्रिया पनि निकै जटिल बन्ने देखिएको छ ।
चार जना नेताहरुले अध्यक्षमै दावी गर्नुभएको छ एक नेताले भने “ति मध्ये दुई जना पक्कै चुनाव लड्नुहुन्छ होला, हर्क बहादुर सिहंले लाइन क्लियर गर्नुभएको छैन तरपनि उहाँले अघी बढ्दा उनका बिरुद्ध धेरै उभिन्छन् भन्ने लाग्दैन, यता युवा नेता दीर्घ सोडारीले महासचिव भुषाल टिमको नेतृत्व गरिरहनु भएको छ, उहाँको सम्भावना पनि उत्तिकै छ, तर सेतीमा मात्रै केन्द्रिय पदाधिकारी र सदस्य सख्यां बढी हुँदा यस पटकको नेतृत्व महाकाली दिनेकी भन्ने चर्चा पनि छ, यो हुँदा लाल बहादुर खड्काको सम्भावना पनि छ, सबैको साझा उमेद्वार युवालाई बनाउन खोजे सुरेन्द्रमान कार्कीपनि बलियो उमेदवार हुन् ।”
अध्यक्षमा चार जनाले दावी गरिरहदा सचिवमा भुवन पाठक, धन बहादुर बोहरा लगायतले दावी गरेका छन् । प्रथम अधिवेशनबाट एक अध्यक्ष, दुई उपाध्यक्ष, एक सचिव तथा ३ उप–सचिव सतिहका पदाधिकारी चुनिने छन ।
अधिवेशनमा पार्टीका अध्यक्ष तथा पूर्वप्रधान मन्त्री माधवकुमार नेपालको प्रमुख आतिथ्यता रहने छ । अधिवेशनमा ९ वटै जिल्ला, प्रदेश जनसंगठन र आयोजक समिति गरी ५ सय भन्दा बढी प्रतिनिधिहरूको सहभागिता रहने बताईएको छ ।
