माघ ०४ धनगढी । धनगढीस्थित त्रिनगर हाटबजार सातै दिन सञ्चालन हुने भएको छ । धनगढी उपमहानगरपालिका वडा नम्बर १, वनदेवीमन्दिरसँगै रहेको हाटबजार सातैदिन सञ्चालन हुने भएको हो । हाटबजारमा हप्ताको तीन दिन धनगढीका किसानले आफ्नो कृषि उपज बिक्री गर्दै आएका भए पनि अब सातै दिन अञ्चालन हुने भएको हो ।
आइतवार, मंगलवार र शुक्रवार धनगढीका किसानले मात्रै कृषि उपज बिक्री गर्दै आएको हाटबजारमा अब सातामा चार दिन सबैका लागि खुल्ला गरिएको छ । सोमवार, बुधवार बिहिवार र शनिवार सबैलाई खुल्ला व्यापार गर्न दिइने नगर प्रमुख गोपाल हमालले बताए । उनले तीन दिन स्थानीय किसानले आफ्नो कृषि उपज बिक्री गर्ने र बाँकी चार दिन अन्य व्यापारीले स्टल राख्न पाउने बताए ।
‘किसानका लागि आइतवार, मंगलबार र शुक्रवार हाटबजार लाग्ने बताउदै उनले बाँकी सोमवार, बुधवार, बिहीबार र शनिवार सबैको लागि हाटबजार लाग्ने बताए । त्रिनगर हाट बजार हप्ताको तीन दिन आइतवार, मङ्गलवार र शुक्रवार मात्रै लाग्दै आएको थियो । हाट बजारलाई किसान मण्डीको रूपमा मात्रै चलाइदै आएको थियो ।
किसान कार्ड बनाएका व्यक्तिले मात्रै हाट बजार लाग्ने दिन व्यापार गर्न पाउने छुट पाएका थिए । धनगढी उपमहानगरपालिकाले फुटपाथमा व्यापार गर्न प्रतिबन्ध लगाएको छ । फुटपाथबाट विस्थापित व्यक्तिलाई व्यापार गर्ने नयाँ ठाउँ दिन सकिएको छैन । त्यसैले फुटपाथबाट विस्थापितहरूलाई हप्तामा चार दिन त्रिनगर हाट बजारमा व्यापार गर्न दिने कार्यपालिकाले निर्णय गरेको नगर प्रमुख हमालले बताए ।
उनले फुटपाथमा व्यापार गर्दै आएकाहरूलाई हाटबजारमा आउन र आफूले बिक्री गर्दै आएको सामान बिक्री गर्न आग्रह गरेका छन् । ‘आइतवार,मंगलवार र शुक्रवार किसानहरूका लागि मात्रै र सोमवार, बुधवार, बिहिवार र शनिवारका दिन सबै किसिमका व्यवसायीका लागि हाटबजार खुला गरिएको छ । सबै किसिमको सामान बिक्री गर्न दिइने बताईएको छ ।
हप्तामा चार दिन दाल, तरकारी, लत्ताकपडा, भाडा वर्तन लगायतका सामग्री बिक्री गर्न खुल्ला गरिएको उनले बताए । धनगढी उपमहानगरपालिकाले महिला उद्यमीहरूका लागि शनिवारिय मेला लगाउँदै आएको छ । त्यस्तै युवा उद्यमीहरूलाई प्रोत्साहन गर्न धनगढीको खुलामञ्च क्षेत्रमा रात्रिकालीन मेला लगाउने बताईएको छ ।
