कात्तिक २८ बैतडी । महाकाली भन्सार कार्यालय झुलाघाटबाट ६५ किलोमिटर टाढाको महाकाली नदी किनारको नागार्जुनस्थित खाणघाटबाट प्रहरीले एक लाख १० हजार रुपैयाँ भन्दा बढीको भन्सार छली गरी ल्याइएको अवैध सामान बरामद गरिएको छ ।
जिल्ला प्रहरी कार्यालय बैतडीबाट खटिएको गस्ती टोलीले सोमबार तल्लोस्वराड क्षेत्रको शिवनाथ गाउँपालिका वडा नम्बर –१, महाकाली नदी किनारको नागार्जुनस्थित खाणघाटबाट चिनी, मिस्री, चामल, आँटा, सलाई, लेडिज चुरा, लेडिज हाते पर्स, स्याम्पु, खेलौना, कापी, लगायतका सामान बरामद गरेको हो ।
बरामद गरिएको सामग्री महाकाली भन्सार कार्यालयमा बुझाइएको बताइएको छ । भारतबाट भन्सार छलि गरी ल्याइएका अन्दाजी एक लाख १० हजार ६ सय ११ रुपैयाँ बराबरको सामान बरामद गरिएको जिल्ला प्रहरी कार्यालय बैतडीका सूचना अधिकारी प्रहरी निरीक्षक बलराम पाण्डेयले जानकारी गराए ।
केही दिन अघि तल्लोस्वराड क्षेत्रबाटै महाकाली नदी किनारको अवैध नाका प्रयोग गरी ल्याएको १६ क्विन्टल चिनी बोकेको ट्रक नियन्त्रणमा लिएर आवश्यक कारबाहीका लागि भन्सार बुझाएको उनले जानकारी गराए ।
पछिल्लो समय तल्लोस्वराड क्षेत्रका शिवनाथ गाउँपालिका र पञ्चेश्वर गाउँपालिकालाई जोड्ने भारतसँग सीमा जोडिएका डुङ्गा चल्ने नाकाबाट भन्सार छलेर अवैध सामान भित्रिन थालेको सूचना पछि प्रहरीले ती स्थानमा गस्तीटोली बढाएको प्रहरीले जानकारी गराएको छ ।
शिवनाथ र पञ्चेश्वर नाकामा सशस्त्र प्रहरी बल नेपालको सीमा सुरक्षा पोष्टले अवैध सामान भित्रिन नदिन गस्ती गर्दै आएको प्रहरीले जानकारी गराएको छ ।
