भदौ २१ धनगढी । सुदूरपश्चिम प्रदेशमा स्वास्थ्य बीमा गराउनेको संख्या बढ्दै गएको छ । सरकारी स्वास्थ्य संस्थामा उपचार गराउँदा बीमा बोर्डले उपचारमा लागेको खर्च व्यहोर्ने भए पछि बीमा गराउनेको संख्या बढ्दै गएको हो । पछिल्लो समयमा सुदूरपश्चिम प्रदेशमा स्वास्थ्य बीमा कार्यक्रममा समावेश हुनेको संख्या बढिरहेको स्वास्थ्य बीमा बोर्ड सुदूरपश्चिमका प्रमुख जनकबहादुर साउदले बताए । उनले सूचना व्यवस्थापन प्रणालीको तथ्याङ्क अनुसार सुदूरपश्चिम प्रदेशमा अहिलेसम्म स्वास्थ्य बीमा गराउनेको संख्या पाँच लाख ८६ हजार नौं सय १५ पुगेको बताए ।
सुदूरपश्चिम प्रदेशमा अहिलेसम्म स्वास्थ्य बीमा गराउनेमा महिलाको संख्या बढी रहेको उनले बताए । स्वास्थ्य बीमा गराउने महिलाको संख्या तीन लाख नौं हजार १२ र पुरुषको संख्या दुई लाख ७७ हजार एक सय ९० रहेको साउदले जानकारी गराए । स्वास्थ्य बीमा बोर्ड सुदूरपश्चिमले दिएको जानकारी अनुसार स्वास्थ्य बीमा गराउनेका संख्या सबैभन्दा बढी कैलालीमा दुई लाख ९९ हजार एक सय ४५ पुगेको छ भने कञ्चनपुरमा ६४ हजार चार सय २० र अछाममा ५७ हजार नौं सय ६४ पुगेको छ ।
त्यसैगरी बझाङमा ४२ हजार एक सय दुई, बाजुरामा ३६ हजार पाँच सय ३६, बैतडीमा २६ हजार एक सय सात, डडेल्धुरामा २३ हजार पाँच सय ६२, डोटीमा २० हजार नौं सय २८ र दार्चुलामा १६ हजार एक सय ५३ जनाले स्वास्थ्य बीमा गराएको बोर्डको तथ्याङ्कले देखाएको छ ।
प्रमुख साउदका अनुसार पुराना बिमित मध्ये करिब ८५ प्रतिशत भन्दा बढीले स्वास्थ्य बीमा नवीकरण गर्ने गरेका छन् । स्वास्थ्य बीमामा सहभागी हुन पाँच जना सदस्य भएको परिवारले वार्षिक तीन हजार पाँच सय प्रिमियम तिर्नुपर्छ भने पाँच जना भन्दा बढी सदस्य भए एक सदस्य बराबर थप सात सयका दरले वार्षिक प्रिमियम बुझाउनु पर्ने प्रावधान छ । बिमित परिवारका सदस्य बिरामी हुँदा एक लाख बराबरको उपचार शुल्क स्वास्थ्य बीमा बोर्डले अस्पताललाई भुक्तानी गर्ने प्राब्धान रहेको छ ।
सरकारी अस्पतालमा उपचार सेवा सहज हुन लागेकाले सर्वसाधारणको स्वास्थ्य बीमामा आकर्षण बढ्न थालेको उनले जानकारी गराए । स्वास्थ्य बीमा गराएका व्यक्तिहरुले प्राथमिक स्वास्थ्य केन्द्र, नगर अस्पताल, जिल्ला अस्पताल, प्रादेशिक अस्पताल र सङ्घीय अस्पतालमा उपचार सेवा प्राप्त गर्दै आएका छन् । बिमितहरूकोे पहिलो सेवा केन्द्रमा उपचार हुन नसके प्रादेशिक र संघीय अस्पतालबाट उपचार सेवा लिँदै आएका छन् ।
सरकारले विसं २०७२ देखि देशका ७७ वटै जिल्लामा स्वास्थ्य बीमा कार्यक्रम लागु गरेको हो । सरकारले २०७२ चैत २५ गते सबै नागरिकमा गुणस्तरीय स्वास्थ्य सेवा पु¥याउने उद्देश्यले कैलाली, इलाम र बागलुङ सहित तीन जिल्लाबाट कार्यक्रम सुरु गरेको थियो । सरकारले अति गरिब, ज्येष्ठ नागरिक, एचआइभी–एड्स सङ्क्रमित, महिला स्वास्थ्य स्वयंसेविका, अतिअशक्त अपाङ्गता भएका व्यक्तिलाई भने निःशुल्क बीमा गर्ने गरेको उनले जानकारी गराए ।
