असोज २३ बैतडी । बैतडीका ग्रामीण क्षेत्रमा डेंगु संक्रमितको संख्या बढ्दै गएको छ । डेंगु परीक्षणको सुविधा भएका ठाउँका प्रयोगशालामा चेकजाँच गर्दा डेंगु संक्रमितको संख्या बढ्दै गएको हो । साउन यता बैतडीमा अहिले सम्म ५८ जनामा डेंगुको संक्रमण पुष्टि भइसकेको स्वाश्थ्यकर्मीहरुले बताएका छन ।
उपचारका लागि स्वास्थ्य संस्थामा आएका बिरामीहरुको चेकजाँच गर्दा उनीहरुमा डेंगु पुष्टि भएको स्वास्थ्य कार्यालय बैतडीका ल्याब टेक्निसियन जयसिंह बडालले जानकारी गराए । परीक्षणको पहुँच नभएका धेरै ठाउँ भएकाले समुदायमा डेंगुका बिरामी अझै बढी हुन सक्ने अनुमान गरिएको छ ।
सिगास गाउँपालिकाको गाँजरी स्वासथ्यचौकीले डेंगु परीक्षण अभियान सञ्चालन गर्दा चार दिनको अवधिमा १० जनामा डेंगु संक्रमण भएको पाइएको बताइृउको छ । ज्वरोका बिरामीहरुमा डेंगु परीक्षण गर्दा चार दिनमै १० जनामा संक्रमण पुष्टि भएको गाँजरी स्वास्थ्यचौकीका प्रमुख जनकसिंह धामीले बताए ।
उनले अहिले गाउँगाउँमा ज्वरोका बिरामी भएको बताउदै धेरैजसोमा डेंगुको संक्रमण देखिन थालेको बताए । एडीज जातको पोथी लामखुट्टेको टोकाइबाट डेंगु सर्ने भएकाले लामखुट्टेको टोकाइबाट बच्नुपर्ने ल्याब टेक्निसियन बडालले बताए । डेंगु परीक्षणका लागि सबै पालिकाहरुमा डेंगु परीक्षण कीट पठाइएकाले ज्वरो आएका बिरामीहरुले नजिकको स्वास्थ्य संस्थामा गएर परीक्षण गर्नुपर्ने स्वास्थ्यकर्मीहरुले बताएका छन ।
साउन यता सबैभन्दा बढी दशरथचन्द नगरपालिकाका ३३ जनामा डेंगु संक्रमणको पुष्टि भएको छ । त्यस्तै सिगास गाउँपालिकाका १३ जनामा, पाटन नगरपालिकाका ५ जनामा, डिलाशैनी गाउँपालिकाका ३ जनामा, पुर्चौंडी नगरपालिकाका ३ जनामा र मेलौली नगरपालिकाका एक जनामा डेंगु संक्रमणको पुष्टि भएको स्वास्थ्य कार्यालयले जनाएको छ । डेङगु भएमा उच्च ज्वरो आउने, टाउको दुख्ने, खान मन नलाग्ने, वाकवाकी लाग्ने, आँखाको गेडी, ढाड, शरीर, घुँडाका जोर्नी दुख्ने, पिँडौलाको मासु दुख्ने आदि लक्षण देखापर्ने उनले बताए ।
डेंगुबाट बच्नका लागि व्यक्तिगत र वातावरणीय सरसफाइमा बिशेष ध्यान दिनुपर्ने स्वास्थ्यकर्मीहरुले बताएका छन । पानी जम्ने खाल्डाखुल्डी पुर्नु पर्ने, पानी जमेको भाँडाकुडा सफा गर्नुपर्ने, धेरैदिन सम्म पानी जमा गरेर नराख्ने लगायतका कुराहरुमा ध्यान दिनुपर्ने स्वास्थ्य कार्यालय बैतडीका प्रमुख योगेशप्रसाद भट्टले जानकारी गराए ।
