साउन २० धनगढी । कैलारी गाउँपालिकामा १५ शय्याको अस्पताल सञ्चालनमा आएको छ । कैलारी गाउँपालिका वडा नम्बर–५ बैजपुरमा निर्माण गरिएको १५ शय्याको अस्पताल बुधबार देखि सञ्चालनमा आएको हो ।
बुधबार अस्पतालको एक कार्यक्रमका बीच कैलारी गाउँपालिकाका अध्यक्ष राजसमझ चौधरीले उद्घाटन गरेका हुन । सङ्घीय सरकारको १८ करोड ५२ लाख रुपैयाँ लगानीमा निर्माण गरिएको उक्त अस्पताल असारमा गाउँपालिकालाई हस्तान्तरण गरिएकोे थियो ।
सङ्घीय सरकारको स्थानीय तहमा अस्पताल निर्माण गर्ने नीतिअनुसार कैलारीमा पनि १५ शय्याको अस्पताल निर्माण गरिएको हो । अस्पताल सञ्चालनमा आए पछि कैलारी गाउँपालिकाको विशेषगरी दक्षिणी क्षेत्रका नागरिकले स्वास्थ्य उपचारका लागि टाढा जानुपर्ने बाध्यताको अन्त्य हुने अपेक्षा गरिएको छ ।
यसअघि गाउँपालिकामा पर्याप्त स्वास्थ्य उपचारको व्यवस्था नहुँदा सामान्य स्वास्थ्य समस्या देखिँदा समेत स्थानीयवासी उपचारका लागि धनगढी पुग्ने गरेका थिए ।
स्थानीय स्तरमै १५ शय्याको अस्पताल सञ्चालनमा आएपछि सामान्य देखि आवश्यक स्वास्थ्य उपचारसम्म गाउँमै उपलब्ध हुने र उपचारका लागि धनगढी तथा भारत जानुपर्ने बाध्यता कम हुने अपेक्षा गरिएको छ ।
