साउन १९ बैतडी । बैतडीको महाकाली भन्सार कार्यालय जुलाघाटले आयातबाट मात्रै लक्ष्य भन्दा १६ प्रतिशत बढी राजस्व संकलन गरेको छ । गत आर्थिक वर्षमा महाकाली भन्सार कार्यालय जुलाघाटले आयातबाट मात्रै लक्ष्य भन्दा १६ प्रतिशत बढी राजस्व संकलन गरेको हो । महाकाली भन्सार कार्यालयमा निर्यातबाट भने शून्य आम्दानी भएको छ ।
गत आर्थिक वर्षमा ९० लाख ९५ हजार राजस्व संकलनको लक्ष्य पाएको कार्यालयले १ करोड ६ लाख १९ हजार ३ सय १९ रुपैयाँ संकलन गरेको कार्यालय प्रमुख लोकेन्द्रबहादुर सिंहले जानकारी गराएका छन । कार्यालयले संकलन गरेको रकम लक्ष्य भन्दा १६.७६ प्रतिशत बढी भएको उनले बताए ।
भन्सार कार्यालयबाट संकलित सबै रकम आयात वस्तुको भन्सार शुल्क, पैठारी, मूल्य अभिवृद्धिबाट प्राप्त भएको बताउदै उनले निर्यात भने सुन्य भएको जानकारी गराए । भन्सार महसुलबाट २६ लाख ६८ हजार ७ सय ८७ रुपैयाँ, पैठारी सेवा दस्तुरबाट २ लाख १२ हजार ५ सय रुपैया, मूल्य अभिवृद्धिकरबाट २१ लाख ४२ हजार १ सय ५५ रुपैयाँ संकलन गरिएको उनले जानकारी गराए ।
त्यसैगरी अन्तशुल्कबाट १ लाख २२ हजार ७ सय ४ र दण्ड जरिवाना धितो लिलामबाट ५४ लाख ६१ हजार १ सय ७३ रुपैयाँ संकलन गरिएको कार्यालयले जनाएको छ । चालु आर्थिक वर्षमा कार्यालयले ९२ लाख राजस्व संकलनको लक्ष्य पाएको छ । आर्थिक वर्ष २०८१÷८२ मा भने कार्यालयले पाएको लक्ष्य भन्दा कम राजस्व संकलन गरेको थियो ।
२०८१÷८२ मा १ करोड ५ लाख लक्ष्य रहेकोमा कार्यालयले ७४ प्रतिशत अर्थात ७७ लाख ७० हजार मात्र राजस्व संकलन गरेको थियो । पछिल्लो समय बैतडीको सबै ठाउँमा सडक सञ्जाल विस्तार भएसँगै कैलाली र कञ्चनपुरबाट थोक विक्रेताका गाडीहरु पसलेको गोदामसम्मै सामान पुर्याउन आउन थालेपछि भन्सारबाट आयात घटेको उनले बताए ।
पहिले भन्सार नाकाबाट चुनढुंगा, घिउ र जडीबुटी निर्यात हुने गरे पनि चार वर्षयता यी बस्तुको निर्यात शून्य भएको प्रमुख सिंहले जानकारी गराएका छन ।
