चैत्र १० धनगढी । सुदूरपश्चिम प्रदेशमा ३ हजार ८ सय १२ जना एचआइभी संक्रमित उपचारमा रहेका छन् । सोमबार स्वास्थ्य निर्देशनालय डोटीले धनगढीमा आयोजना गरेको कार्यक्रममा ३ हजार ८ सय १२ जना एचआइभी संक्रमित उपचारमा रहेको जानकारी गराईएको हो ।
सुदूरपश्चिम प्रदेशमा एड्स हेल्थ फाउण्डेसन नेपालको सहयोगमा एचआइभी संक्रमितहरुका लागि विभिन्न कार्यक्रम सञ्चालनमा रहेको निर्देशनालयका क्षयकुष्ठ अधिकृत मनोज ओझाले जानकारी गराए । एड्स हेल्थ फाउण्डेसन एक अन्तर्राष्ट्रिय संस्था हो, जसले विश्वका करिब ५० देशहरूमा एचआईभी तथा एड्स सम्बन्धी कार्यक्रम सञ्चालन गर्दै आएको अधिकृत ओझाले जानकारी गराए ।
नेपालमा एड्स हेल्थ फाउण्डेसनले १९ वटा एआरटी केन्द्र तथा २ वटा सीमा नाकाहरूमा सहकार्य गर्दै सेवा सुदृढीकरणमा सहयोग गर्दै आएको जानकारी गराउदै उनले सुदूरपश्चिम प्रदेशमा ४ वटा एआरटी केन्द्र मार्फत प्रत्यक्ष सहयोग प्रदान गरिरहेको बताए ।
यसका अतिरिक्त एड्स हेल्थ फाउण्डेसनले समुदाय स्तरमा जनचेतना अभिवृद्धि, जोखिम समूह लक्षित कार्यक्रम, परीक्षण सेवाको विस्तार, तथा गुणस्तरीय औषधि र उपचार सेवामा पहुँच सुनिश्चित गर्न महत्वपूर्ण भूमिका निर्वाह गर्दै आएको उनले बताए । सुदूरपश्चिम प्रदेशमा बिशेष गरेर भारतमा काम गर्ने श्रमिकहरुबाट एचआइभी संक्रमण फैलिने गरेको पाइएको उनले बताए ।
प्रदेशमा १९ ओटा एचआइभी परीक्षण तथा परामर्श केन्द्र, १९ ओटा एआरटी सेवा केन्द्र र ३ ओटा भाइरल लोड परीक्षण केन्द्र रहेको अधिकृत ओझाले जानकारी गराए । सुदूरपश्चिम प्रदेशमा सबैभन्दा बढी कैलालीको गोदावरी नगरपालिकामा २ सय ९१ जना एचआइभी संक्रमित रहेको उनले जानकारी गराए ।
प्रदेशका ८८ वटा पालिका मध्ये ६ वटा पालिकामा एचआइभी संक्रमितको संख्या शून्य रहेको उनले जानकारी गराए । कम्तीमा १० जनासम्म एचआइभी संक्रमित रहेका पालिकाको संख्या २६ वटा भएको जानकारी गराउदै उनले कम्तीमा २० जना एचआइभी संक्रमित रहेका पालिकाको संख्या १७ वटा रहेको जानकारी गराए ।
कम्तीमा ५० जना एचआइभी संक्रमित रहेका पालिकाको संख्या १६, कम्तीमा १ सय जना एचआइभी संक्रमित रहेका पालिकाको संख्या १३ र कम्तीमा २ सय एचआइभी संक्रमित रहेका पालिकाको संख्या ८ रहेको उनले जानकारी गराए ।
प्रदेशका २ वटा पालिकामा २ सय बढी एचआइभी संक्रमित रहेको अधिकृत ओझाले जानकारी गराए । एचआइभी संक्रमितहरुलाई गरिने भेदभाव अन्त्यका लागि पत्रकारहरु मार्फत सन्देश प्रवाह गर्ने उद्देश्यले अन्तरक्रियाको आयोजना गरिएको एड्स हेल्थ फाउण्डेसन नेपालले जनाएको छ ।
