चैत्र १० धनगढी । श्रम संस्कृति पार्टीका अध्यक्ष हर्क साम्पाङ राईले दार्चुलाको महाकालीमा पुल निर्माण गर्न ढुङ्गा बोक्न र गिट्टी कुट्न आब्हान गरेका छन । महाकाली नदीमा पुल बनाउने भन्दै आफ्ना मान्छेलाई दार्चुला पठाएका राईले ढुङ्गा बोक्न र गिट्टी कुट्न फेसबुकबाटै आह्वान गरेका हुन् ।
धरान उपमहानगर पालिकाको मेयरबाट राजीनामा दिएर सुनसरी–१ बाट प्रतिनिधि सभा सदस्यमा निर्वाचित भएका राईले श्रमदानबाटै महाकाली नदीमा पुल निर्माण गर्ने घोषणा गरेका छन् ।
उनले सामाजिक सञ्चाल फेसबुकमा दार्चुलाको पुल बनाउँदा कुनै किसिमको राजनीतिक उद्देश्य नराखेको उल्ले गर्दै भोट नदिँदा पनि हुन्छ तर कसैले खुट्टा तान्ने र विरोध गर्ने नगर्नु होला ! आउनुस् सङ्गै मिलेर ढुङ्गा बोकौँ, गिट्टी कुटौँ !’लेखेका छन ।
हर्कले दार्चुलाको व्याँस गाउँपालिका वडा नम्बर २ दुम्लिङमा पुल निर्माण गर्ने तयारी गरेका छन् । उक्त ठाउँमा पुल नहुँदा तुइन तर्नुपर्ने बाध्यता रहेको छ । भारतीय पक्षले पुल निर्माणका लागि अनुमति नदिँदा नेपाली पक्षले यसअघि पटक–पटक प्रयास गर्दा पनि पुल निर्माण हुन नसकेको दार्चुलाका स्थानीय चक्रबहादुर बमले बताएका छन ।
दार्चुलको लाली देखि व्याँस गाउँपालिकाको सितापुल सम्म महाकाली नदीमा १० वटा झोलुङ्गे पुल तथा एक मोटरेवल पुल निर्माण भएको छ । जिल्ला सदरमुकाम महाकाली नगरपालिका वडा नम्बर–६ को काँकडामा भर्खरै मोटरेवल पुल निर्माण भएको छ । तर दुम्लिङमा पुल नहुँदा स्थानीयले पुल तर्न ६ किलोमिटर तल माल भन्ने ठाउँ पुग्नुपर्ने बाध्यता रहेको छ ।
