चैत्र ०७ धनगढी । अन्तर्राष्ट्रिय जातीय विभेद उन्मूलन दिवस देशभर मनाइएको छ । संयुक्त राष्ट्रसंघले सन् १९६५ मा जातीय तथा रंगभेद उन्मूलन सम्बन्धी महासन्धि पारित गरेको उपलक्ष्यमा हरेक वर्ष २१ मार्चलाई विश्वभर विविध कार्यक्रम गरी जातीय विभेद उन्मुलन दिवसका रुपमा मनाउने गरिएकोमा यस बर्ष पनि देशभर अन्तर्राष्ट्रिय जातीय विभेद उन्मूलन दिवस मनाइएको हो ।
दिवसको अवसरमा दलित समाज विकास मञ्च बैतडीले विभिन्न अन्तरक्रियात्मक छलफल गरेको छ । एकता परिवर्तनका लागि किशोरी समूहसँगको सहकार्यमा दिवसको अवसरमा छलफलको आयोजना गरिएको दलित समाज विकास मञ्चकी अध्यक्ष सरस्वती नेपालीले बताइन् ।
नेपालले कानुन बनाएरै जातीय विभेद र छुवाछूतलाई दण्डनीय हुने व्यवस्था गरेको छ भने २०६३ सालमा पुर्नस्थापित संसद्ले जातीय भेदभावमुक्त राष्ट्र घोषणा समेत गरीसकेको छ । वर्तमान संविधानले समेत जातका आधारमा हुने भेदभावलाई दण्डनीय अपराध मानेको छ । तर व्यवहारमा भने कानुनको पूर्ण रुपमा कार्यान्वयन हुन सकेको छैन् ।
जातका आधारमा ठुलो असमानता र विभेद व्याप्त नेपालमा अहिले पनि जातीय विभेद र अत्याचारका असामान्य घटनाहरू भइरहेका छन् ।
जातीय विभेद अन्त्यका लागि राज्यका निकायहरुमा अझै पनि दलित समुदायको पहुँच न्यून रहेको अध्यक्ष नेपालीले बताइन् । संसद, सरकार र राज्यका अन्य निकायहरूमा दलित समुदायको प्रतिनिधित्व न्यून रहेको उनले बताएकी छिन ।
