असार १२ बाजुरा । बाजुराको बुढीगंगा नगरपालिका अबदेखि ‘बार्जु नगरपालिका’ हुने भएको छ । नगरपालिकाको १२ औँ नगर सभाले सर्वसम्मत निर्णय गर्दै नयाँ नामकरण प्रस्ताव पारित गरेपछि बार्जु नगरपालिका’ हुने भएको हो ।
नगरपालिका ऐतिहासिक नामले पुनः परिचित हुने भएको छ । स्थानीय बुढीगंगा नदीको नामबाट राखिएको पुरानो नाम हटाउनुको पछाडि प्रशासनिक झन्झट देखि ऐतिहासिक सन्दर्भ सम्मका विभिन्न कारणहरू रहेको बताईएको छ ।
‘बार्जु’ नाम केवल नयाँ पहिचान नभई बाजुराको इतिहाससँग गाँसिएको शब्द भएको नगर प्रमुख राम बहादुर बानियाँकाले बताए । बाइसे–चौबिसे राज्यकालमा ‘बार्जु’ एक समृद्ध र शक्तिशाली राज्यको केन्द्र भएको बताउदै उनले किंवदन्ती अनुसार अहिलेको ‘बाजुरा’ भन्ने नाम पनि ‘बार्जु’ शब्दबाट अपभ्रंश भएर आएको बताए ।
यही ऐतिहासिक सन्दर्भलाई सम्मान गर्दै ‘बार्जु’ नाम पुनःस्थापित गरिएको नगर प्रमुख बानियाँले बताए । ऐतिहासिक चिनारी, जुन बार्जु सभ्यता हो, त्यसैलाई टेकेर नाम राख्ने निर्णय गरेको उनले बताए । यो हाम्रो सभ्यता र इतिहास प्रतिको सम्मान पनि हो ।’ नगरपालिकाले अब उक्त निर्णय प्रदेश सभामा पठाउने छ ।
प्रदेश सरकारको मन्त्रिपरिषद्ले स्वीकृति दिए पछि यो प्रस्ताव संघीय मामिला तथा सामान्य प्रशासन मन्त्रालयमा जान्छ उनले भने । त्यसपछि नेपाल सरकारको मन्त्रिपरिषद्को स्वीकृति पछि मात्र ‘बार्जु नगरपालिका’ आधिकारिक रूपमा मान्यता प्राप्त गर्ने उनले बताए ।
