बैशाख २२ अछाम । मनमोहक प्राकृतिक सौन्दर्यले भरिएको रामारोशन क्षेत्रको प्रवद्र्धन र विकासका लागि रामारोशन महोत्सव आयोजना गरिने भएको छ । बाह्रबण्ड अठारखण्ड’ ले परिचित यस प्रसिद्ध पर्यटकीय गन्तव्यको प्रचार प्रसारका लागि वैशाख २५ देखि ३१ गते सम्म महोत्सव आयोजना गरिने भएको हो ।
महोत्सवमा स्थानीय कला, संस्कृति, कृषि प्रदर्शनी, परम्परागत खेलकुद, फोटो प्रदर्शनी र पर्यटकीय पदयात्रा जस्ता विविध कार्यक्रम समावेश गरिने आयोजकले जानकारी गराएको छ ।
प्राकृतिक सौन्दर्यले भरिपूर्ण रामारोशन क्षेत्रलाई देश–विदेशमा चिनाउँदै आन्तरिक तथा बाह्य पर्यटक आकर्षित गर्न महोत्सव आयोजना गर्न लागिएको आयोजक समिति संयोजक जनक साउँदले बताए ।
महोत्सवले स्थानीय उत्पादनको बजार विस्तार गर्नुका साथै युवापुस्तामा पर्यटन प्रतिको आकर्षण पनि बढाउने विश्वास गरिएको उनले बताए । महोत्सवमा स्थानीय परिकार, स्वास्थ्य सुविधा र सुरक्षाका प्रबन्धहरू मिलाइएको उनले जानकारी गराए ।
मुजाबगरमा आयोजना हुने महोत्सवले रामारोशन भ्रमण गर्न चाहने पर्यटकहरूका लागि सहज वातावरण तयार पार्ने उनले बताए । साथै, महोत्सव अवधिभर रामारोशनको विविध पक्षबारे विस्तृत जानकारी प्रदान गरिने बताउदै उनले सहभागीताका लागी सबैलाई आग्रह गरेका छन ।
महोत्सवबाट सङ्कलित रकम आगलागीबाट प्रभावित जयगढ र साँफेबगरका पीडितहरूलाई राहतस्वरूप सहयोग गरिने उनले जानकारी गराए । नेपाल पर्यटन बोर्ड, रामारोशन गाउँपालिका लगायतका स्थानीय तह र विभिन्न निकायहरूको सहकार्यमा महोत्सव सञ्चालन गरिने उनले जानकारी गराए ।
