माघ २९ धनगढी । धनगढीको जाखोर ताल चरा अवलोकनका लागि महत्वपूर्ण गन्तव्य बनेको छ । कैलालीको धनगढी उपमहानगरपालिका वडा नम्बर– ७, देवहरिया बनस्पति उद्यानमा रहेको उक्त ताल पछिल्लो समय चरा अवलोकनका लागि मुख्य गन्तव्य बनेका हो ।
उक्त तालमा विभिन्न प्रजातिका रैथाने र आगन्तुक जलपन्छीको उपस्थिति देखिन थालेको छ । हरिहाँस, नकटा, सिलसिले हाँस, बगाले सिम कुखुरा, लामऔँले, कुर्मा, कर्रा साउँरी, जलेवा, बकुल्ला लगायतका विभिन्न प्रजातिका जलपन्छी देखिने गरेको चराविद् एवं अनुसन्धानकर्मी हिरुलाल डगौराले बताए ।
देहरिया वनस्पति उद्यानमा १२.५ हेक्टर क्षेत्रफलमा फैलिएको उक्त तालमा यस वर्ष १७ प्रजातिका जलपन्छी अभिलेख भएको उनले जानकारी गराए । सहरी क्षेत्रमा उक्त ताल चरा अवलोकनका लागि निकै महत्वपूर्ण गन्तव्य रहेको उनले बताए ।
पछिल्लो समय चरा अवलोकनका लागि विभिन्न ठाउँबाट चराप्रेमी जाखोर ताल पुग्ने गरेको बताउदै उनले उक्त तालमा नेपालमा सङ्कटापन्न नकटा चरासहित सिलसिले हाँसको उपस्थिति निकै राम्रो भएको बताए ।
हाँस जातिको ठुलो नकटा चरा जाखोर तालमा दिनभरी पानीमा आहारविहार गरेको दृश्य आकर्षक देखिने गरेको बताउदै उनले विभिन्न प्रजातिका चराको आवाजले मन आनन्दित बनाउने गरेको बताए ।
