मंसिर ०३ धनगढी । कैलाली र कञ्चनपुरबाट २१ लाख बराबरको अवैध सामान बरामद गरिएको छ । दुईटै जिल्लाका विभिन्न स्थानबाट २० लाख ९९ हजार ९ सय ८० रुपैया मूल्य बराबरको अवैध सामान बरामद गरिएको हो ।
आइतबार कञ्चनपुरको भीमदत्त नगरपालिका वडा नम्बर–४ महेन्द्रनगर बजारको कबडहल जाने सडकबाट सुपप्र ०१००१ ख २६११ नम्बरको मिनिटाटालाई शंका लागि चेकजाँच गर्दा अवैध रुपमा भारतबाट भन्सार छली ल्याएको अन्दाजी १० लाख ४ हजार ४ सय मूल्य बराबरको चक्लेट, सुदर्शन सुपारी, सुर्ती, नरिवल, दाल, चिनि लगायतका सामान बरमद गरिएकोे प्रहरीले जानकारी गराएको हो ।
सामान सहित गाडी र चालक बैतडीको दशरथचन्द नगरपालिका वडा नम्बर–२ बस्ने २८ वर्षका दीपक सिंह भाट र गाडीसाहु कञ्चनपुरको भिमदत्त नगरपालीका वडा नम्बर–४ बस्ने २४ वर्षका शम्भु भट्टलाई जिल्ला प्रहरी कार्यालय कञ्चनपुरबाट खटिएको प्रहरी टोलीले नियन्त्रणमा लिई आवश्यक कारबाहीको लागि भन्सार कार्यालय गड्डाचौकी कञ्चनपुर पठाएको प्रदेश प्रहरी कार्यालय धनगढीले जानकारी गराएको छ ।
आइतबार भीमदत्त नगरपालीका वडा नम्बर–४ बसपार्क, भीमदत्त नगरपालीका वडा नम्बर–६ ऐठपुर, भीमदत्त नगरपालीका वडा नम्बर–१० गड्डाचौकी र भीमदत्त नगरपालीका वडा नम्बर–११ चौकीसत्ताबाट भारतबाट भन्सार छली ल्याएका अन्दाजी ८ लाख ६५ हजार ६ सय ८० रुपैया बराबरको चिनि, मिश्री, जुत्ताचप्पल, कपडा, हार्डवेयर, मोबइलका सामान, किराना लगायतका सामानहरु जिल्ला प्रहरी कार्यालय कञ्चनपुर तथा मातहतका कार्यालयहरुबाट खटिएको प्रहरी गस्ती टोलीले बेवारिसे अवस्थामा फेला पारी नियन्त्रणमा लिएको प्रहरीले जानकारी गराएको छ ।
त्यसैगरी कैलालीको धनगढी उपमहा नगरपालीका वडा नम्बर–२ पुरानो भन्सार रोड, गोदावरी नगरपालिका वडा नम्बर –१ धनगढी रोड र टीकापुर नगरपालिका वडा नम्बर–९ बालुवाटारबाट भारतबाट भन्सार छली ल्याएका २ लाख २९ हजार ९ सय मूल्य बराबरको प्याज, बिडी, सुर्ती, सुटपिस, फोटो फ्रेमिक कभर, फोटोकपी पेपर, प्लाष्टिक झिल्ली, छिद्रा माछा लगायतका सामान सुदूरपश्चिम प्रदेश प्रहरी कार्यालय धनगढी, जिल्ला प्रहरी कार्यालय कैलाली मातहत कार्यालयहरुबाट संयुक्त खटिएको गस्ती टोलीले बेवारिसे अवस्थामा फेला पारी नियन्त्रणमा लिएको प्रहरीले जानकारी गराएको छ ।
