भदौ २२ बैतडी । बैतडीको मेलौली नगरपालिका वडा नम्बर–९, मा गाउँमा खाद्य सङ्कट निम्तिन थालेपछि वडा कार्यालयले पर्यावरणीय सन्तुलन कायम गरेर जीविकोपार्जन गर्न सामुदायिक नीति, २०८१ जारी गरेर बाँझो जग्गा उपयोग गर्ने कार्यक्रम घोषणा गरेको छ ।
मेलौली नगरपालिका वडा नम्बर–९, विशालपुरले वडामा खाद्य सङ्कट निम्तिए पछि सामुदायिक नीति घोषणा गरेर बाँझो जग्गा उपयोग गर्ने, जलवायु अनुकूलन खेती गर्न रैथाने मूल बिउ जोगाउने, खानेपानीका मुहानमा सिमेन्टको प्रयोग नगर्ने, पर्यावरण जोगाउन रिचार्ज पोखरी निर्माण, पशुपालनका लागि घाँस खेती गर्ने र वातावरण जोगाउन पाँच हजार वृक्षरोपण गर्ने नीति सार्वजनिक गरेको छ । केही वर्षअघि विशालपुर गाउँका ३ सय ५६ परिवारले कोदो खेती गर्दै आएकोमा अहिले जम्मा ६० परिवारले मात्रै कोदो खेती गरेको बताइएको छ ।
गाउँमा सडक पुगेपछि बाहिरबाट खाद्यान्न आउन थालेको छ । घरपरिवारका लागि खाद्यान्न किन्न युवा विदेशमा रोजगारी खोज्न हिँडेका छन । पानीका मुहान सुक्न थालेका छन । लामो खडेरी पर्दा अधिकांश जग्गा बाँझो छ । तथ्याङ्क अनुसार विशालपुरका ४ सय २९ घरपरिवारमध्ये ७३ परिवार बसाइँसराइ गरेर तराई झरेका छन ।
बाँकी रहेका ३ सय ५६ परिवारलाई वर्षभरि दुई लाख १० हजार ५ सय ४५ किलो खाद्यान्न आवश्यक पर्ने गरेकोमा वडाका ४२ गाउँटोलमा वार्षिक ४६ हजार किलो मात्रै खाद्यान्न उत्पादन हुने गरेको छ । एक लाख ६४ हजार ४ सय ६४ किलो खाद्यान्न किनेर खानुपर्ने अवस्था छ ।
गाउँमा खाद्य सङ्कट, खडेरी, बेरोजगारी र बसाइँसराइको दर बढ्न थालेपछि समुदाय र वडा कार्यालयको साझेदारीमा सामुदायिक नीति घोषणा गरिएको मेलौली नगरपालिका वडा नम्बर–९ का वडाध्यक्ष लोकराज भट्टले बताए ।
मेलौली नगरपालिकाका नगरप्रमुख भीमबहादुर चन्दले वडामै पुगेर ‘पर्यावरणीय सन्तुलन तथा जीविकोपार्जन सम्बन्धी सामुदायिक नीति, २०८१’ घोषणा गरेका छन । भदौ ११ गते वडा कार्यालयबाट अनुमोदन भएको सामुदायिक नीति नगरप्रमुख चन्दले १८ गते वडामै पुगेर सार्वजनिक गेरेका हुन् ।
