भदौ १४ धनगढी । प्रहरीले भन्सार छलीका सामान बरामद गरेको छ । कैलालीको बिभिन्न स्थान धनगढी उपमहानगरपालिका वडा नम्बर ७ सरस्वती स्कुल नजिक, धनगढी उपमहानगरपालिका वडा नम्बर १० जुगेडा, गोदावरी नगरपालिका वडा नम्बर ३ मालाखेती र गोदावरी नगरपालिका वडा नम्बर ४ बाट अबैंध रुपमा भारतबाट भन्सार छली गरि ल्याएका अन्दाजी ४ लाख २५ हजार ४ सय ६५ मूल्य बराबरको सामान प्रहरीले बरामद गरेको हो ।
उक्त स्थानबाट प्याज, सुर्ती, नरिवल, बिभिन्न कम्पनीका मोबाईल डिस्प्ले, प्लाष्टिक झिल्ली लगायतका सामान जिल्ला प्रहरी कार्यालय कैलालीबाट खटिएको प्रहरी टोलीले बिहीवार वेवारिसे अवस्थामा फेला पारी नियन्त्रणमा लिएको प्रह्रीले जानकारी दिएको छ ।
त्यस्तैगरी कञ्चनपुरको पुनर्वास नगरपालिका वडा नम्बर १ डोकेबजारबाट अबैंध रुपमा भारतबाट भन्सार छली गरि ल्याएका अन्दाजी ३२ हजार ७ सय मूल्य बराबरको सामान बरामद गरेको छ । उक्त मूल्य बराबरको साडी, धोती, सुटपिस, तन्ना लगायतका सामान प्रहरी चौकी परासन, कञ्चनपुरबाट खटिएको प्रहरी टोलीले वेवारिसे अवस्थामा फेला पारी नियन्त्रणमा लिएको जानकारी दिएको छ ।
