साउन १३ धनगढी । सुदूरपश्चिमको एक मात्र उपमहानगरपालिका धनगढीको आन्तरिक आयमा वृद्धि भएको छ । अघिल्लो आर्थिक वर्षको तुलनामा गत आर्थिक वर्षमा उपमहानगरको आन्तरिक आम्दानीमा वृद्धि भएको हो । उपमहानगरले आर्थिक वर्ष २०८०÷०८१ मा ३३ करोड १२ लाख ५२ हजार रुपैया आन्तरिक आम्दानी गरेको छ ।

आर्थिक वर्ष २०७९÷०८० मा उपमहानगरको आन्तरिक आम्दानी २७ करोड ९२ लाख १५ हजार रहेको थियो । उपमहानगरले अघिल्लो आर्थिक वर्ष भन्दा आर्थिक वर्ष २०८०÷०८१ मा ५ करोड २० लाख ३७ हजार रुपैया आन्तरिक आम्दानी गरेको उपमहानगरका राजश्व शाखा प्रमुख लेखनाथ ओझाले जानकारी दिए ।

उपमहानगरले आर्थिक वर्ष २०८०÷८१ मा सम्पत्तिकरबाट ३ करोड ४४ लाख २९ हजार, भूमिकरबाट ९ करोड ५ लाख ४५ हजार, बहालकरबाट ७ करोड ५५ लाख ८१ हजार, बहाल बिरौटीकरबाट ४५ लाख १२ हजार, सवारी साधन करबाट ६ लाख ४० हजार र अन्य करबाट ५ लाख ४९ हजार रुपैयाँ आम्दानी गरेको उनले जानकारी गराए ।

त्यसैगरी सरकारी सम्पति बहालबाट प्राप्त आय ९४ लाख १७ हजार, सरकारी सम्पत्ति विक्रीबाट ६७ हजार, अन्य सेवा शुल्कबाट ८ लाख ७७ हजार, शिक्षा क्षेत्रको आम्दानी २३ लाख १९ हजार, पार्किङ शुल्कबाट ७८ लाख ९७ हजार, नक्सा पास दस्तुरबाट ३ करोड ९ लाख ६९ हजार, सिफारिस दस्तुरबाट १ करोड ९२ लाख ७१ हजार रुपैयाँ आम्दानी भएको ओझाले जानकारी गराए ।

त्यसैगरी व्यक्तिगत घटना दर्ता दस्तुर १६ लाख १८ हजार, नाता प्रमाणित दस्तुर ४ लाख ८७ हजार, अन्य दस्तुरबाट ९ लाख ३६ हजार, प्रशासनिक दण्ड जरिवानाबाट ७४ लाख २९ हजार, व्यवसायबाट ३ करोड ९८ लाख ५६ हजार, अन्य राजस्व ७ करोड ९२ लाख ३४ हजार, बेरुजु बाफत ६ लाख ५८ हजार, सामुदायिक वनबाट प्राप्त आय ३२ हजार, विज्ञापन करबाट ५ हजार र अन्यबाट ९ लाख १३ हजार रुपैयाँ आम्दानी भएको राजश्व शाखा प्रमुख ओझाले जानकारी गराए ।