असार १६ धनगढी । कैलालीको सत्ती भन्सार कार्यालयले चालु आर्थिक वर्ष २०८०÷८१ को ११ महिनामा नौ करोड ८० लाख ७८ हजार राजस्व संकलन गरेको छ । सत्ती भन्सार कार्यालयले चालु आर्थिक वर्षमा १२ करोड एक लाख ४७ हजार राजस्व संकलन गर्ने लक्ष्य लिएकोमा नौ करोड ८० लाख ७८ हजार राजस्व संकलन गरेको हो ।

सत्ती भन्सार कार्यालयका प्रमुख दिनहरि सापकोटाले १४ दिनमा लक्ष्यमा पुग्न नसकिने अबश्था देखिए पनि गत वर्षको तुलनामा यस वर्ष राजस्व बढ्ने बताए । गत आर्थिक वर्षमा भन्सार कार्यालयले १६ करोड ९४ लाख ४१ हजार राजस्व संकलन गर्ने लक्ष्य लिएकोमा सात करोड ५० लाख ४० हजार राजस्व संकलन भएको प्रमुख सापकोटाले जानकारी गराए ।

यस वर्ष लक्ष्य प्राप्तिको नजिक पुगेको बताउदै उनले सत्ती भन्सार कार्यालयले प्रशासनिक सेवा शुल्कवाफत ६४ हजार, बेरुजुबाट एक लाख, एकलौटी फार्म तथा व्यक्तिगत आयमा लाग्ने करतर्फ ४१ हजार, अन्तः शुल्क आयातमा २३ लाख ११ हजार, भन्सार महसुल आयातमा पाँच करोड एक लाख, कृषि सुधार शुल्कमा एक लाख आठ हजार, भन्सार सम्बन्धी अन्य आयमा ६ लाख ३९ हजार, मूल्य अभिवृद्धि कर आयातमा चार करोड ४६ लाख ९७ हजार तथा हरित करबाट चार हजार राजस्व संकलन भएको जानकारी गराए ।

सत्ती भन्सार भएर आयातको तुलनामा निर्यात सुन्य भएको बताउदै प्रमुख सापकोटाले भन्सार भएर खाद्यान्न, लत्ताकपडा, दैनिक उपभोग्य सामग्री तेकुनियाँ भएर आयात गरिँदै आएको बताए । खुला सीमाका कारण राजस्व संकलनमा समस्या भएको प्रमुख सापकोटाले बताए ।