बैशाख २४ धनगढी । सुदूरपश्चिमका सीमा नाकामा कार्यरत हेल्थ डेस्कका स्वास्थ्यकर्मीहरुले १० महिना देखि तलब नपाएको गुनासो गरेका छन । कैलालीको गौरीफन्टा नाका र कञ्चनपुरको गड्डाचौकी नाका, बैतडीको झुलाघाट र दार्चुला हेल्थ डेस्कमा जोखिम मोलेर सेवा प्रवाह गरिरहेका स्वास्थ्यकर्मीहरुले १० महिना देखि पारिश्रमिक नपाएको गुनासो गरेका हुन ।
लामो समयदेखि तलब नपाए पछि स्वास्थ्यकर्मीहरुले आइतबार देखि हातमा कालोपट्टि बाँधेर काम गरिरहेका छन् । गौरीफन्टा र गड्डाचौकीसँगै बैतडीको झुलाघाट र दार्चुला गरी चार स्थानमा कार्यरत हेल्थ डेस्कका कर्मचारीहरुले १० महिना देखि तलव नपाउदा समस्या भएको बताएका छन । हेल्थ डेस्क स्थानीय तहहरुले स्थापना गरे पनि कर्मचारीको व्यवस्थापन स्वास्थ्य सेवा विभागले गर्दै आएको छ । विभागबाटै बजेट निकासा नभएका कारण सुदूरपश्चिमका चार वटै हेल्थ डेस्कमा करारमा कार्यरत २७ जना स्वास्थ्यकर्मीहरुले तलव नपाएको बताइएको छ ।
स्वास्थ्यकर्मीले साउन यता तलब नपाएको प्रदेश स्वास्थ्य निर्देशनालयका कोभिड स्थानीय स्रोत व्यक्ति हेमराज जोशीले बताए । सीमा नाकामा रहेको हेल्थ डेस्कका स्वास्थ्यकर्मीले १० महिना देखिको तलब नपाउँदा खर्च चलाउन समेत समस्या भइरहेको बताएका छन् । कञ्चनपुरको गड्डाचौकीस्थित हेल्थ डेस्कमा कार्यरत ल्याब टेक्निसियन लक्ष्मी रिमाल धामीले साउन यता तलब नपाउँदा घर खर्च चलाउन मुस्किल भएको गुनासो गरिन् । “साउन देखि तलब नपाएको बताउदै उनले खर्च चलाउन समेत गाह्रो भएको बताईन ।
तबलको कुरा गर्दा बजेट पास भएको छैन, काम गर्दै गर्नुस् भन्ने गरेको उनले सुनाईन । गड्डाचौकी हेल्थ डेस्कमा ११ जना स्वास्थ्यकर्मी कार्यरत रहेको उनले बताईन । पटक पटक माथिल्लो निकायमा उक्त विषयमा जानकारी गराउदा पनि समस्या समाधान हुन नसकेपछि बाध्य भएर हातमा कालोपट्टि बाँधेर काम गरिरहेको उनले बताईन । उनले पारिश्रमिक आएन भने आउँदो जेठ १ गतेदेखि सेवा बन्द गर्ने बताईन । उनले स्वास्थ्य कार्यालय र जिल्ल्ला प्रशासन कार्यालयमा आग्रह गर्दा पनि कुनै सुनुवाइ नभएको बताइन् ।
हेल्थ डेस्कका हेल्थ असिस्टेन्ट विशाल भट्टले पारिश्रमिक मात्रै होइन करार पनि थप नभएको बताए । “काम गर्दै गर्नुस् करार थपिन्छ भनेको धेरै र्भईसकेको बताउदै उनले करार पनि नथपीएको र पारिश्रमिक पनि नपाएको बताए । गड्डाचौकीस्थित हेल्थ डेस्कका इञ्चार्ज प्रेमसिंह भण्डारीले बजेट अभाव देखाएर स्वास्थ्यकर्मीको तलब नआएको बताए । स्वास्थ्यकर्मीले तलब नपाए पछि सेवा बन्द हुने अवस्थामा पुगेको उनले बताए । उनले स्वास्थ्यकर्मीले एक साता हातमा कालोपट्टि बाँधेर काम गर्ने र त्यसपछि पनि सुनुवाइ नभए सेवा बन्द गर्ने चेतावनी दिएका छन् ।
