चैत ५ काठमाडौं । फागुन महिनामा मात्रै ६१ हजार ८ सय ४५ जना नेपाली रोजगारीका लागी विदेशिएका छन् । वैदेशिक रोजगार विभागका अनुसार विदेशिने संख्या माघ महिनाको तुलनामा फागुनमा कम देखिएको छ । माघमा ६४ हजार २ सय ८४ जना युवा रोजगारीका लागि विदेशिएका थिए । नयाँ श्रमस्वीकृति तथा पुनः श्रम स्वीकृति सहित उक्त संख्यामा युवाहरु विदेशिएको वैदेशिक रोजगार विभागले जनाएको हो । फागुनमा ५६ हजार ७ सय १९ जना पुरुष र ५ हजार १ सय २६ जना महिला कामको खोजीमा विदेशिएका छन् ।
म्यानपावर एजेन्सी माफर्त २९ हजार २ सय ८८ जना युवा विदेशिएका छन् भने ५ हजार ५ सय ३६ जना व्यक्तिगत रुपमा नयाँ कामदारको रुपमा विदेशिएका छन । विभागका अनुसार जीटूजी मार्फत २ हजार १ सय ७० जना युवा विदेश गएका छन् भने व्यक्तिगत रुपमा पुनः श्रम स्वीकृति लिनेको संख्या २४ हजार ८ सय ५१ जना रहेको छ । तथ्यांक अनुसार फागुन महिनामा मलेसियाका लागि १९ हजार ८ सय २४ जनाले श्रम स्वीकृति लिएका छन् । कतारका लागि ११ हजार ३ सय ३ जनाले श्रम स्वीकृति लिएका छन् ।
युनाइटेड अरब इमिरेट्समा मात्र ९ हजार ७ सय ९५ जना विदेशिएका छन् । साउदी अरबमा ९ हजार ५ सय ३ जना पुगेका छन् । कुवेतका लागि २ हजार ४ सय ६२ जनाले स्वीकृति लिएको विभागको तथ्यांकले देखाएको छ । कोरियामा २ हजार २ सय २७ जनाले स्वीकृति लिएका छन् । रोमानियामा १ हजार ७० जनाको स्वीकृति जारी भएको छ । जापानमा ८ सय ७१ जना, पोल्याण्डमा ६ सय र बहराइनमा ५ सय ९५ जनाले स्वीकृति लिएको विभागको तथ्यांकले देखाएको छ ।
त्यसैगरी फागुन महिनामा धनुषाबाट ३ हजार १ सय २९, झापाबाट २ हजार ७ सय ३५, मोरङबाट २ हजार ३ सय ९६, सिराहाबाट २ हजार ३ सय ४५, महोत्तरीबाट २ हजार ३ सय ५, रुपन्देहीबाट १ हजार ८ सय १६ र सर्लाहीबाट १ हजार ७ सय २५ जना विदेशिएका छन् । नेपालबाट विदेशिने युवामध्ये फागुनमा अधिकांश युवा दक्ष योग्यताका छन् ।
विभागका अनुसार फागुनमा विदेशिने मध्ये ४२ हजार ७ सय १८ जना युवा दक्ष थिए । त्यसैगरी १३ हजार ५ सुय ८० जना अदक्ष युवा विदेशिएका छन् । दक्षभन्दा माथिल्लो स्तरको योग्यता भएका ५ हजार ४ सय ४९ जना युवाले श्रम स्वीकृति लिएका छन् । प्रोफेसनल योग्यताका ६८ र उच्च दक्षता हासिल गरेका ३० जना वैदेशिक रोजगारीमा गएको विभागको तथ्यांकले देखाएको छ ।
