बैशाख ०२ धनगढी । सुदूरपश्चिम प्रदेशका सात वटा जिल्लामा जिल्ला खेलकुद समितिका नयाँ अध्यक्ष नियुक्त गरिएका छन । प्रदेशका सामाजिक विकास मन्त्री मेघराज खड्काको अध्यक्षतामा बसेको प्रदेश खेलकुद परिषद्को बोर्ड बैठकले नयाँ अध्यक्ष नियुक्त गर्ने निर्णय गरेसंगै अध्यक्ष नियुक्त गरिएका हुन ।
परिषद्का सदस्य सचिव लोकबहादुर खड्काले कैलालीमा दिनेश भण्डारी, कञ्चनपुरमा ज्ञानेन्द्र सिंह, बैतडीमा भुपेन चन्द, अछाममा गोकुल बहादुर शाह, बझाङमा कमलबहादुर सिंह, बाजुरामा कोपिलाकुमारी सिंह र डडेल्धुरामा जगतबहादुर ऐरलाई अध्यक्षमा नियुक्त गरिएको जानकारी गराए ।
राजनीतिक भागबण्डाका आधारमा गरिएको नियुक्तिमा बैतडीका भुपेन चन्द र बाजुराकी कोपिलाकुमारी सिंह एमालेको कोटाबाट चयन भएका छन् भने बाँकी पाँच जिल्लाका अध्यक्ष कांग्रेसको सिफारिसमा नियुक्त गरिएको जनाइएको छ । नवनियुक्त अध्यक्षहरूलाई चार वर्षे कार्यकालका लागि जिम्मेवारी दिइएको परिषद्ले जनाएको छ । यसअघि डोटी र दार्चुला जिल्लामा अध्यक्ष चयन भइसकेका छन् ।
