जेठ ०७ डडेल्धुरा । माओवादी केन्द्रबाट डडेल्धुराको आलिताल गाउँपालिका अध्यक्षमा निर्वाचित शेरसिंह पार्की गाउँगाउँमा र खेतमै पुगेर मतदातालाई धन्यवाद दिदै आएका छन । वैशाख ३० गते सम्पन्न भएको स्थानीय तह निर्वाचन अन्तर्गत नेकपा अध्यक्ष पार्की किसानको खेत बारीमै पुगेर मतदातालाई धन्यवाद दिँदै आएका हुन ।
किसानलाई मकै छर्ने चटारो छ त्यसैले अध्यक्ष पार्की खेत बारीमै पुगेर चुनाव जिताएकोमा मतदातालाई धन्यवाद दिदै आएका हुन । पार्की मात्र नभई डडेल्धुराको सातवटै स्थानीय तहको परिणाम सार्वजनिक भइसके पछि नवनिर्वाचित जनप्रतिनिधिहरूले शपथ लिएर पदभार ग्रहण गरिसकेर मतदातालाई धन्यवाद दिनमा व्यस्त रहेका छन ।
यसका साथै मतदाताहरूले विजयी जनप्रतिनिधिलाई अविर, माला लगायर आफ्नो गाउँमा स्वागत समेत गरिरहेका छन् । मतदाताले आफ्नो गाउँ–ठाउँको समस्या सामाधान गरिदिन नवनिर्वाचित अध्यक्ष पार्कीलाई आग्रह गरेका छन् । उनले आफूले चुनावका बेला गरेका सबै बाचाहरू पाँचवर्षे कार्यकालमा पूरा गरेर छाड्ने प्रतिबद्धता समेत जाहेर गरेका छन ।
कांग्रेसका बलबहादुर गुरुबलाई हराउँदै अध्यक्षमा पार्की र कांग्रेसकै जलाकुमारी विष्ट बोगटीलाई पछि पार्दै माओवादीकै मैनाकुमारी रावल बोहरा उपाध्यक्षमा विजयी भएका थिए । अध्यक्षमा निर्वाचित पार्कीले २३ सय ८९ मत ल्याएका थिए । उनका प्रतिद्वन्द्वी गुरुबले २२ सय २४ मत पाएका थिए ।
उपाध्यक्षमा विजयी रावलले २६ सय २ मत पाउँदा कांग्रेसकी बोगटीले २२ सय ४१ मत ल्याएकी थिइन् । ८ वटा वडा रहेको आलितालमा माओवादी केन्द्र र एमाले समान ३–३ वडामा र कांग्रेस २ वटा वडामा विजयी भएको छ ।
