फागुन २० कञ्चनपुर । छोरा छोरी सहित श्रीमान बेपत्ता भए पछि अलपत्र परेकी श्रीमतीे जंगलको किनारमा झुपडी बनाएर एकलै बास बस्न बाध्य भएकी छिन ।
कञ्चनपुरको बेलौरी नगरपालिकाको कुण्डा घर भएकी २८ वर्षीया उमा चौधरी शुक्लाफाँटा नगरपालिका वडा नम्बर ११ कलुवापुरस्थित वसन्त सामुदायिक वनको किनारमा झुपडी बनाएर दुई महिना देखि एकलै बास बस्दै आएकी हुन ।
श्रीमान् रामबहादुर चौधरीले कुटपिट गरी छोराछोरी लगेर अलपत्र पारे पछि दुई महिना देखि वन क्षेत्रमा झुपडी बनाएर एकलै बस्दै आएको
उनले बताईन । श्रीमानले कुटपीट गर्दा आफु माइती गएका बेला जग्गा बेचेर एक छोरा र दुई छोरी सहित श्रीमान बेपत्ता भए पछि वन क्षेत्रमा आएर एकलै बस्दै आएको उनले बताईन । वन क्षेत्रमा रुखमुनि बस्दै गरेको देखे पछि स्थानीयवासीको सहायतामा कलुवापुर बजार नजिकैको वनमा स्थानीयले झुपडी बनाइ दिएको उनले बताईन ।
नजिकैको गाउँबाट मागेर खाँदै आएकी चौधरीले लगाउने ओढ्ने कपडा समेत मागेर गुजारा चलाउने गरेको जानकारी गराइन । कृष्णपुर नगरपालिका वडा नम्बर २ मा रहेका माइतीले समेत नहेरे पछि बाध्य भएर वन क्षेत्रमा बस्नु परेको उनले पीडा सुनाईन ।
वडाध्यक्ष दिलबहादुर बुढाले एक्लै महिला वन क्षेत्रमा तुषारो समेत नछेक्ने झोपडीमा बस्दै गरेको देखे पछि वनछेउकै मन्दिरमा साधु बस्ने कुटीको बरण्डामा बस्ने व्यवस्था मिलाई दिएको जानकारी गराए ।
उनको उद्धार गरी बसोवासको व्यवस्था मिलाउन परोपकारी संस्थाको खोजीमा लागेको वडाध्यक्ष बुढाले जानकारी गराए ।