राजन नेपाली । फागुन १४ बझाङ । बझाङको जयपृथ्वी नगरपालिका साक्षर नगरपालीका घोषणा गरिएको छ । हेमन्तवाडा,रिठापाटा, कैलास, सुवेडा,चैनपुर र लुयाटा गाउँ बिकास समिति मिलाएर बनेको जयपृथ्वी नगरपालिका क्षेत्रका सबै वडाहरुको अनुगमन गरि साक्षर नगर धोषणा गरिएको हो ।
दुई बर्ष अघि जयपृथ्वी नगरपालिकाका मेयर विरेन्द्र बहादुर खड्काको अध्यक्षतामा अनुगमन टोली गठन गरी १८ जना सहजकर्ता तोकेर गाउँमा डाँटा संकलन गरिएको नगरपालीकाले जनाएको छ । प्रगतिशील युवा समाज र जयपृथ्वी नगरपालिकाको साँझेदारीमा साक्षरता अभियान चलाएको नगरपालिकाले जनाएको छ ।
नगर क्षेत्रका ११ वटै वडामा गएर केही घरधुरीमा अन्तिम अनुगमन गरेर निरक्षरहरुको नामावली संकलन गरिएको
बताईएको छ । पछिल्लो अनुगमनका क्रममा ९५ प्रतिशत भन्दा बढीले लेखपढ गर्न सक्ने अर्थात् साक्षर व्यक्ति पाइएको नगरपालिकाका शिक्षा शाखा संयोजक राजेन्द्र जोशीले बताए ।
अनुगमनमा घरधुरी, घरको मूली, परिवार सदस्य संख्या, साक्षर व्यक्ति, निरक्षर व्यक्ति, १५ वर्ष मुनिको उमेर समूह तथा ६० वर्ष भन्दा माथि उमेर समूहका व्यक्ति लगायतको विषयमा सर्वे फारम समेत भरिएको बताइएको छ । सरकारको मापदण्ड अनुसार ९५ प्रतिशत व्यक्ति साक्षर रहेको अवस्थामा साक्षर गाउँ, नगर तथा जिल्ला घोषणा गर्नसक्ने व्यवस्था रहेको छ ।
सो मापदण्ड अनुसार जयपृथ्वी नगरपालिकामा साक्षर व्यक्ति ९५ प्रतिशत बढी रहेकाले साक्षर नगर घोषणाका लागि उपयुक्त रहेको जयपृथ्वी नगरपालिकाका प्राविधिक सहायक देविन्द्र जोशीले बताए ।
उनका अनुसार नगरपालिकाकामा करिब १ हजार ५ सय निरक्षर व्यक्तिहरुको डाटा संकलन भए पछि साक्षरता सहजकर्ताहरु पठाएर दुई बर्ष सम्म नगरपालिकाका वडा तथा टोलहरुमा साक्षरता कार्यक्रम संचालन गरिएको थियो । त्यसपछि नगरपालिका साक्षर घोषणा गरिएको हो ।
