माघ २९ दार्चुला । भारतीय डिभाइसयुक्त शंकास्पद बेलुन दार्चुलामा खसेको छ । दार्चुलाको नौगाड गाउँपालिकामा आकाशबाट विद्युतीय यन्त्र जडित बेलुन
खसेको हो ।
तीन ओटा ब्याट्री जडान गरिएको विद्युतीय यन्त्र जस्तो देखिने बेलुन खसेको वडा नम्बर ३ खारका स्थानीय अर्जुनसिंह ठगुन्नाले जानकारी गराए । उनले आकाशमा उडिरहेको बेलुन विद्युतीय पोलमा ठोक्किएर खसे पछि हेर्दा भारतीय मोबाइल नम्बर लेखिएको ब्याट्री जडित डिभाइस पाइएको जानकारी गराउदै उनले विद्युतीय यन्त्र जस्तो देखिने उक्त वस्तु भित्र मेमोरी कार्ड जस्ता प्लेटहरू, तीन ओटा ब्याट्री जडान गरिएको जानकारी गराए ।
उनले भारतीय मोबाइल नम्बर लेखिएको बताउदै मोबाइल नम्बरमा फोन गर्दा उत्तराखण्ड प्रदेशको राजधानी देहरादुनस्थित भारतीय मौसम विज्ञान विभागको रहेको जानकारी प्राप्त भएको छ ।
भारतीय मौसम विज्ञान विभागले वायुमण्डलको डाटा संकलनका लागि बेलुन बाँधेर उक्त डिभाइस उडाउने गरेको फोनमा जवाफ मिलेको उनले बताए । नौगाड गाउँपालिकाका योजना शाखा अधिकृत नरेन्द्र ठगुन्ना, विपद् व्यवस्थापन शाखा प्रमुख कृष्ण सिंह ठगुन्ना लगायतको टोली पनि उक्त स्थानमा पुगेको बताईएको छ ।
उक्त विषयमा बुझ्न प्रहरी टोली खटाइएकाले विस्तृत जानकारी नआएको जिल्ला प्रहरी कार्यालय दार्चुलाका प्रहरी निरीक्षक माधव विश्वकर्माले जानकारी गराउनु भयो । यस अघि पनि दार्चुलाको आकाशमा यस्ता शंकास्पद वस्तुहरू भेटिएको प्रहरी निरीक्षक विश्वकर्माले जानकारी गराउनु भयो ।
