माघ १८ कञ्चनपुर
आगो ताप्ने क्रममा घरमा आगलागी हुँदा एक जनाको मृत्यु भएको छ । कञ्चनपुरको भीमदत्त नगरपालिका वडा नम्बर ९ स्थित खरले छाएको कच्ची घरमा आगलागी हुँदा ५० वर्षीय पदम ऐरको मृत्यु भएको हो । घरका अन्य सदस्य भने सकुशल रहेको जिल्ला प्रहरी कार्यालय कञ्चनपुरका प्रवक्ता एवं प्रहरी नायव उपरीक्षक चक्रबहादुर शाहले जानकारी गराउनु भयो । त्यसैगरी कञ्चनपुरको बेलडाँडी गाउँपालिका वडा नम्बर १ झिलमिलाबस्ती स्थित लक्ष्मण सिंह धामीको पक्की घरमा विद्युत् सर्ट भई कोठामा आगलागी भएको छ ।
मिटर बक्समा भएको आगलागीबाट उक्त कोठामा राखिएका तीन थान नागरिकता, शैक्षिक कागजात, टेबुल, प्रगति युवा समाजका खेलाडीका ड्रेस (जर्सी) लगायतका सामग्री जलेर नष्ट भएको इलाका प्रहरी कार्यालय बेलडाँडीका प्रहरी निरीक्षक रवीन्द्र कठायतले जानकारी गराउनु भयो ।