माघ ४ बैतडी , डम्मर अवस्थीको हत्या आरोपमा प्रहरीे नियन्त्रणमा रहेका नवराज अवस्थीले डम्बर अबश्थीको हत्यामा आफ्नो संलग्नता गरेको स्वीकार गरेका छन् । बैतडीको सुर्नया गाउँपालिका वडा नम्बर ६ खर्काधारका डम्मर अवस्थीको हत्या आरोपमा प्रहरीले आइतबार नियन्त्रणमा लिएका नवराजलाई सोधपुछ गर्दा उनले हत्यामा संलग्नता रहेकोे स्वीकार गरेको प्रहरीले जनाएको हो । जिल्ला प्रहरी कार्यालयका प्रवक्ता प्रहरी निरीक्षक बोधराज ओझाले अदालतबाट म्याद थप गरेर उनीमाथि थप अनुसन्धान गरिने जानकारी गराउनु भयो । यस अघि खर्काधारका हरिश अवस्थीले पनि डम्मरको हत्यामा संलग्न रहेको स्वीकार गरिसकेका छन् ।
गएको मंसिर १४ गतेबाट हराएका डम्मरको शव गत बुधबार स्थानीय धुरा जंगलको गुफामा गाडेको अवस्थामा भेटिएको थियो । शवको पोस्टमार्टम भइसके पनि उनको अन्तिम संस्कार हुन सकेको छैन । उनका आफन्तहरूले हत्यामा संलग्न भएका सबै पक्राउ नपर्दा सम्म शव नबुझ्ने अडान लिएका छन् ।
डम्मर विप्लव नेतृत्वको नेकपाका कार्यकर्ता समेत भएकाले उनको पार्टीले समेत हत्यामा संलग्न सबैको पहिचान गरी कारबाही हुनु पर्ने, उचित क्षतिपूर्ति दिनु पर्ने र सहिद घोषणा गर्नु पर्ने माग अघि सारेको बताईएको छ ।