माघ १३ बझाङ,
जिल्ला कारागार बझाङमा कैदीबन्दी बढी हुँदा भेटघाट बन्द गरिएको छ।
भेटघाटको क्रममा कैदीबन्दीलाई कोरोना सर्न सक्ने भएकाले कारागार प्रशासनले भेटघाट बन्द गरेको हो ।
भेटघाटका क्रममा कारागारमा रहेका कैदीबन्दीलाई कोरोना सर्न सक्ने जोखिम उच्च रहेकाले अर्को सूचना जारी नभएसम्मको लागि तत्काललाई भेटघाट बन्द गरिएको बझाङ कारागार प्रमुख धन बहादुर घर्तीले बताउनु भयो ।
नयाँ भेरियन्ट पहिलेको भन्दा जटिल भएकाले भेटघाटमा प्रतिबन्ध लगाउँदै आफन्तलाई गेटबाट फर्काउने गरेको उनले जानकारी गराए । जिल्ला अदालत बझाङले सजाय वा पुर्पक्षमा पठाउने कैदीबन्दीलाई कोरोना परीक्षण अनिवार्य गरिएको उनले जानकारी गराए । २५ जना राख्न सक्ने क्षमता रहेको जिल्ला कारागार बझाङमा अहिले तिन गुणा बढी ७९ जना कैदीबन्दी राखिएको कारागार प्रमुख घर्तीले बताउनु भयो । ७५ जना पुरुष कैदीबन्दी रहेको कारागारमा महिलाहरू बस्नको लागि भने भवन नभएकाले अन्य जिल्ला पठाउने गरेको घर्तीले बताउनु भयो ।
कारागारमा रहेका कैदीबन्दी मध्ये ७९ जनाले पहिलो चरणको, कोरोनाविरुद्धको खोप लगाएको र ५९ जनाले दोस्रो चरणको खोप र ४७ जनाले तेस्रो चरणको खोप लगाइसकेको जिल्ला कारागार बझाङमा कार्यरत अहेव अनिल नेपालीले जानकारी गराए ।
