जेठ १२ धनगढी । बेहडाबाबा मन्दिरमा गङ्गादशहरा मेला सुरु भएको छ । हरेक वर्ष जेठ महिनाको शुक्लपक्ष दशमी तिथिका दिन लाग्ने गङ्गादशहरा धार्मिक मेला मङ्गलबार राति १२ बजे देखि विधिवत् रूपमा सुरु भएको हो । धनगढी उपमहानगर पालिका वडा नम्बर–१६ को जङ्गल क्षेत्रमा अवस्थित बेहडाबाबा मन्दिरमा रहेको शिवलिङ्गमा मध्यरातमा पूजाआजा सहित जल चढाएर मेलाको सुरुवात गर्ने परम्परा अनुसार मेला सुरु भएको हो ।
बेहडाबाबा मन्दिरको दर्शनका लागि नेपालका विभिन्न जिल्ला सहित भारतबाट हजारौँ श्रद्धालु आउने गरेका छन् । भारतीय भक्तजनमा बेहडाबाबा प्रति विशेष श्रद्धा रहेको छ । दर्शन गरेमा शुद्ध मनले मागेका कामना पूरा हुने, सुख–शान्ति, समृद्धि तथा सन्तान प्राप्ति हुने विश्वास रहेको बताइन्छ । भारतको उत्तर प्रदेश खिरीस्थित भिराका सोहनलाल साहुले बेहडाबाबाको दर्शन र पूजाआजा गरेमा मनोकामना पूरा हुने विश्वास रहेको बताए ।
सन्तान नहुनेले बेहडाबाबाको दर्शन गरेमा सन्तान प्राप्त हुने जनविश्वास रहेको उनले बताए । विगत केही वर्षदेखि प्रत्येक वर्ष गङ्गादशहराका अवसरमा दर्शन गर्न आफू यहाँ आउने गरेको उनले बताए । जेठको चर्को गर्मीका बाबजुद पनि भारतीय श्रद्धालुहरूले गौरीफन्टा नाका देखि बेहडाबाबा मन्दिर सम्म प्रायः पैदल यात्रा गर्ने गरेका छन् । झोलाझम्टा र बालबच्चा सहित उनीहरूले करिब १२ किलोमिटरको दूरी हिँडेर पार गर्ने गरेका छन ।
मन्दिर व्यवस्थापन समितिले भारतीय श्रद्धालुका लागि मन्दिर परिसरमा धर्मशाला सञ्चालन गर्दै आएको जानकारी गराएको छ । समितिका अध्यक्ष खेमबहादुर चन्दले गङ्गादशहरा मेला जेठ गते १२ देखि १५ गतेसम्म सञ्चालन हुने जानकारी गराउदै भारतबाट आउने तीर्थालुलाई सहज आवत जावतको व्यवस्था मिलाउन प्रशासनसँग आग्रह गरिएको बताए ।
नाकामा कडाइ बढेकाले दर्शनार्थीलाई सहज रूपमा आउन दिने आवश्यक वातावरण बनाउन आग्रह गरिएको उनले बताए । बेहडाबाबा मन्दिरमा भारतको लखिमपुर, पलिया, चन्दनचौकी, तिकुनियाँ, बेलराया, भिरा र साहजाँपुर लगायत क्षेत्रबाट श्रद्धालु आउने गरेका छन् । त्यसैगरी नेपालका विभिन्न जिल्लाबाट पनि भक्तजनहरु दर्शन गनएका लागि बेहडाबाबा पुग्ने गरेका छन् ।
