जेठ १२ टीकापुर । अत्याधिक गर्मी बढेपछि कैलालीको टिकापुर स्थित एउटा विद्यालयका विद्यार्थीहरु कक्षा कोठामै बेहोस हुन थालेका छन् । सोमबार र मंगलबार टीकापुरस्थित कर्णाली माध्यामीक विद्यालयमा अध्ययनरत विद्यार्थीहरु बेहोस् भएका हुन । सोमबार चार जना विद्यार्थी बेहोस् भपछि उनीहरुलाई आराम कक्षमा राखेर उपचार गरिएको थियो । मंगलबार पनि दुई जना किशोरी बिरामी भएको कर्णाली माध्यामीक विद्यालयका प्रधानाध्यापक धर्मराज शर्माले बताए ।
गर्मीले बालबालिका र शिक्षकलाई पठन पाठन गर्न कठिन भएको बताउदै उनले गर्मी बढेपछि विद्यालयमा बिहानको प्रार्थना बन्द गरिएको बताए । एउटै कक्षामा सयौँ विद्यार्थी भएको बताउदै उनले गर्मीले दैनिक रूपमा विद्यार्थी बिरामी हुन थालेपछि बिरामीलाई आराम कक्षमा आराम गराएर घर पुरयाउने गरिएको बताए । कैलालीको तापक्रम ४० डिग्री सेल्सियस भन्दा माथि पुगेका कारण गर्मी बढेकाले दिउँसोको समयमा विद्यार्थीलाई अध्ययनमा समेत समस्या हुन थालेको उनले बताए ।
टीकापुरका कतिपय विद्यालयमा एउटै कक्षामा विद्यार्थी सङ्ख्या धेरै भएपनि पङ्खा थोरै हुँदा गर्मीमा अध्ययनमा समस्या हुन थालेको उनीहरुले बताएका छन । गर्मीका समयमा विद्युत् अनियमित हुँदा विद्यार्थीलाई बढी समस्या हुने गरेको बताईएको छ । जल तथा मौसम विज्ञान कार्यालय अत्तरियाका नायब मौसम विज्ञान सहायक वीरेन्द प्रसाद कुशवाहले सोमबार कैलालीको तापक्रम ४१.४ डिग्री सेल्सियस मापन गरिएको जानकारी गराउदै आइतबार ४० डिग्री सेल्सियस पुगेको जानकारी गराए ।
मंगलबार अधिकतम तापक्रम ४१ डिग्री सेल्सियस रहेको उनले बताए । चालिस डिग्री सेल्सियस माथि तापक्रम पुगेपछि पठनपाठन प्रभावित हुन थालेको छ । खड्ग स्मृति माध्यामीक विद्यालयका अमित परियारले एउटै कक्षामा ८० जना भन्दा माथि विद्यार्थी भएकाले अध्ययनमा समस्या भइरहेको बताउदै विद्यार्थी बिरामी हुने,बेहोस हुने जस्ता समस्या भएको बताए । ’कतिपय गर्मी सहन नसकेर बीचमै पढाइ छोडेर घर जाने गरेको बताउदै उनले टाउको दुख्यो, चक्कर आयो भन्ने बढेको बताए ।
राष्ट्रिय माध्यामीक विद्यालय मनिकापुरकी अनुष्का चौधरीले एउटै कक्षामा धेरै विद्यार्थी भएको बताउदै पङ्खाको सङ्ख्या कम भएको अबश्थामा बत्ति जाँदा झनै कठिन हुने गरेको बताइन् । वत्ती गएका बेला असिनपसिन हुने बताउदै उनले एक सातायता गर्मी सहन नसकिने भएको बताईन । त्यसैगरी त्रिभुवन माध्यामीक विद्यालयकी सञ्जिता चौधरीले विद्यालयका पङ्खा गतिला नभएकाले गर्मीमा समस्या हुने गरेको बताइन् ।
’पङ्खा भए पनि राम्रो हावा दिने खालका नभएको बताउदै उनले बिजुली अनियमित हुँदा झनै कठिन हने गरेको बताईन । कालिका आधारभूत विद्यालयकी अनुष्का विकले कक्षामा तीन वटा पङ्खा भए पनि दुई वटा मात्र राम्ररी चल्ने, बिजुली गएका बेला पङ्खाबिनै बस्नुपर्दा समस्या हुने गरेको बताइन् । जनज्योति आधारभूत विद्यालयकी मिष्टिना सञ्ज्यालले कक्षा कोठामा भएका चार वटा पङ्खामा दुई वटा मात्र चल्दा विद्यार्थीलाई गर्मीले समस्या हुने गरेको बताईन । दुई वटा पङ्खा बिग्रिएको बताउदै उनले तिनको मर्मत पनि नगरिएको बताईन ।
दिउँसो १२ बजेपछि विद्यार्थीलाई गर्मी सहन गाह्रो हुने बताउदै उनले विद्यालयमा चिसो पानीको सुविधा पनि नभएको बताईन । टीकापुरका धेरै जसो विद्यालय दिउँसोको समयमा सञ्चालनमा रहेका छन् । जेठको अत्याधिक गर्मीका बेला पनि बिहानी कक्षा सञ्चालन गरिएको छैन । दिउँसो बालबालिकालाई गर्मीले सताउने गरेको अभिभावले समेत गुनासो गर्ने गरेका छन । केही विद्यालयमा टिनका छाना भएकाले बिजुली गएका बेला बस्नै कठिन हुने गरेको छ ।
विद्यालयले चाहे अनुसार बिहान वा दिउँसो कक्षा सञ्चालन गर्न सक्ने टीकापुर नगरपालिकाका शिक्षा अधिकृत नरेश अवस्थीले बताएका छन । अभिभावक, विद्यार्थीबाट गुनासो आएको बताउदै उनले विद्यालय बन्द गर्दा कोर्स पूरा नहुने भएकाले विद्यालयमा पङ्खा लगायतका समस्या विद्यालयले व्यवस्थापन गर्नु पर्ने बताए ।
समस्या भए पालिकाले सघाउँने बताउदै उनले कक्षा सञ्चालनका लागि विद्यालयले अवस्था अनुसार बिहान वा दिउँसो कक्षा सञ्चालन गर्न सक्ने बताए । टीकापपुरमै केही दिन अघि पनि तालिमका क्रममा सशस्त्र प्रहरी बलका जवान ‘हिट स्ट्रोक’का कारण बेहोस भएका थिए । उनीहरुको अहिले काठमाडौँमा उपचार भइरहेको छ ।
