बैशाख १५ बाजुरा । बाजुराको पर्यटकीय स्थलका रूपमा परिचित रानीसैन पछिल्लो समय बेरोजगार युवाको रोजगारीको माध्यम बनेको छ । हिमाली गाउँपालिकाले रानीसैनको संरक्षण तथा प्रवर्धनलाई प्राथमिकतामा राखेर बाटो बनाइदिए पछि बेरोजगार युवाका लागि रोजगारीको माध्यम बनेकोे हो ।
हिमाली गाउँपालिकाले केही वर्षयता त्यहाँसम्म पुग्ने गोरेटोबाटो निर्माण गरिदिए पछि आन्तरिक तथा बाह्य पर्यटक पनि पुग्न थालेको हिमाली गाउँपालिका वडा नम्बर ३ का मङ्गलबहादुर बुढाले जानकारी गराए । पर्यटक पुग्न थालेसँगै गाउँ बस्तीका बेरोजगार युवाका लागि रोजगारीको अवसर सिर्जना हुन थालेकोे जानकारी गराउदै उनले पर्यटकीय स्थल रानीसैनले बेरोजगार युवालाई रोजगारीको अवसर सिर्जना गरिदिएको जानकारी गराए ।
केही वर्ष पहिला रानीसैन गुमनाम रहेको बताउदै उनले अहिले स्थानीय सरकारले गोरेटोबाटो सम्म निर्माण गरेपछि प्रचार प्रसारमा आउन थालेको जानकारी गराए । आन्तरिक तथा बाह्य पर्यटक भित्रिन थालेपछि उनीहरूको सामान बोकेर बेरोजगार युवाले दैनिक तीन हजार रुपैयाँ सम्म कमाउन थालेको जानकारी गराउदै उनले पर्यटकीय स्थललाई अझै व्यवस्थित गर्न सकेमा हिमाली गाउँका स्थानीयको लागि ठुलो अवसर सिर्जना हुन सक्ने बताए ।
अहिले आएका पाहुनालाई खाने, बास बस्ने ठाउँ राम्रो नभएको बताउदै उनले त्यसको ब्याबश्था गर्न सके जिल्ला भरिका युवा बेरोजगार भएर बस्नु नपर्ने बताए । त्यसको उचित व्यवस्थापनका लागि भौतिक पूर्वाधार विकासमा जोड दिनु पर्ने जानकारी गराउदै उनले जिल्ला सदरमुकाम मार्तडी देखि करिब १ सय ६५ किलोमिटर दुरीमा रहेको रानीसैनबाट छिमेकी जिल्ला बझाङको साइपाल र मानसरोवर जान नजिक रहेको जानकारी गराए । रानीसैन अत्यन्तै आकर्षक तथा मनमोहक ठाउँ भएको उनले बताए ।
