बैशाख १५ धनगढी । धनगढीमा १२ औँ संस्करणको हाफ म्याराथन प्रतियोगिता आयोजना हुने भएको छ । धनगढी जेसिजको आयोजनामा आगामी वैशाख १८ गते हाफ म्याराथन प्रतियोगिता आयोजना हुने भएको हो । हरेक वर्ष वैशाख १ गते आयोजना हुँदै आएको दौड यस पटक वैशाख १८ गते सारिएको धनगढी जेसिजका अध्यक्ष महेश्वर ओझाले जानकारी गराए ।
“अब धनगढी दौडिन्छ” भन्ने नाराका साथ प्रतियोगिताको तीव्र तयारी भइरहेको उनले जानकारी गराए । २१.१ किलोमिटरको हाफ म्याराथन तर्फ प्रथम हुनेले ७७ हजार ७ सय ७७, दोस्रो हुनेले ५५ हजार ५ सय ५५ र तेस्रो हुनेले ४४ हजार ४ सय ४४ रुपैयाँ पुरस्कार प्राप्त गर्ने प्रतियोगिता संयोजक दीपेश बोहराले जानकारी गराए ।
उनले यो संस्करण अहिले सम्मकै भव्य रूपमा आयोजना गरिने जानकारी गराए । वैशाख १८ गते बिहान ६ बजे धनगढी रंगशालाबाट सुरु हुने दौडको उद्घाटन सुदूरपश्चिम प्रदेशका मुख्यमन्त्री कमल बहादुर शाहले गर्ने कार्यक्रम तय गरिएको उनले बताए । दौड रंगशालाबाट गेटा मेडिकल कलेज हुँदै पुनः रंगशालामै टुंगिने बताईएको छ ।
प्रतियोगितामा ५ किलोमिटर महिला दौड तथा कर्पोरेट दौड पनि समावेश गरिएको छ । ती दुवै विधातर्फ विजेताले ७ हजार ७ सय ७७, दोस्रो हुनेले ५ हजार ५ सय ५५ र तेस्रो हुनेले ४ हजार ४ सय ४४ रुपैयाँ पुरस्कार पाउने छन् । यस पटकको हाफ म्याराथनलाई लागूऔषध विरुद्धको अभियानका रूपमा लिइएको आयोजकले जानकारी दिएको छ ।
सबैभन्दा धेरै रक्तदान गर्ने दीपक उपाध्यायलाई विशेष आकर्षणका रूपमा प्रस्तुत गरिने छ । साथै सहभागी मध्ये एक जनालाई चिट्ठा मार्फत पुरस्कार प्रदान गरिने र निसर्ग अस्पतालले गोलाप्रथाबाट छनौट भएका तीन जनालाई आधारभूत स्वास्थ्य सेवा उपलब्ध गराउने जानकारी दिएको छ ।
