बैशाख १५ धनगढी । बझाङमा अझै पनि राष्ट्रिय प्रसारण लाइनको विद्युत् सेवा नपुगेको विषउ उठान गर्दै जेनजी युवा नेता कमल थापाले ऊर्जा, जलस्रोत तथा सिँचाइ मन्त्री विराज भक्त श्रेष्ठलाई ज्ञापनपत्र बुझाएका छन ।
विद्युत् विस्तारलाई तीव्रता दिन र बहुप्रतिक्षित पश्चिम सेती जलविद्युत् आयोजना यथाशीघ्र कार्यान्वयनमा ल्याउन सरकारसँग माग गर्दै उनले सिँचाइ मन्त्रीलाई ज्ञापन पत्र बुझाएका हुन ।
ज्ञापन पत्रमा दुर्गाथली गाउँपालिका वडा नम्बर ५, ६, ७, थलारा गाउँपालिका वडा नम्बर २, ३, ४, ७, ८, केदारस्यु गाउँपालिका वडा नम्बर ६, ७, ८ तथा बुङ्गल नगरपालिका वडा नम्बर २, ३, १० लगायतका विभिन्न बस्तीहरू अझै पनि विद्युत् सेवाबाट वञ्चित रहेको उल्लेख गरिएको छ ।
थापाले ज्ञापनपत्र बुझाउँदै विद्युत् अभावकै कारण स्थानीयवासीहरू शिक्षा, स्वास्थ्य, सञ्चार तथा दैनिक जीवनका आधारभूत सेवाबाट समेत प्रभावित भइरहेको बताएका छन ।
२१ औँ शताब्दीमा पनि बझाङका नागरिक अन्धकारमा बस्न बाध्य हुनु दुःखद विषय भएको बताउदै उनले अब सरकारले गम्भीर भएर तत्काल ठोस कदम चाल्नुपर्ने बताएका छन । ठेक्का प्रक्रिया पूरा भइसके पनि कार्यान्वयनमा भइरहेको ढिलासुस्ती प्रति आपत्ति जनाउँदै निर्माण व्यवसायीहरूलाई काम छिटो सम्पन्न गराउन उनले माग गरेका छन ।
त्यसैगरी, सुदूरपश्चिमको गौरवका रूपमा लिइएको पश्चिम सेती जलविद्युत् आयोजना लामो समय देखि अन्यौलमा परिरहेको बताउदै उनले यसलाई यथाशीघ्र अघि बढाउनु पर्नेमा जोड दिएका छन । आयोजना सञ्चालनमा आएमा हजारौँ युवालाई रोजगारी सिर्जना हुने र क्षेत्रीय आर्थिक विकासमा महत्वपूर्ण योगदान पुग्ने उनले बताएका छन ।
विद्युत् आजको आधारभूत आवश्यकता भएकाले यसको अभावले जनजीवनमा गम्भीर असर परेको ज्ञापन पत्रमा उल्लेख गर्दै सम्बन्धित निकायलाई उच्च प्राथमिकताका साथ काम अघि बढाउन निर्देशन दिन सरकारसँग आग्रह गरिएको छ । साथै, निर्धारित समयमै आयोजना सम्पन्न गर्न ठेकेदारहरूलाई जिम्मेवार बनाउने व्यवस्था गर्न पनि माग गरिएको छ ।
स्थानीयवासीहरूले सरकारको ध्यानाकर्षण गराउँदै अब ढिला नगरी विद्युत् सेवा विस्तार र पश्चिम सेती आयोजना कार्यान्वयनमा ठोस निर्णय लिनु पर्ने बताएका छन् ।
