बैशाख १५ धनगढी । कैलालीको लम्कीचुहा नगरपालिका स्थित लम्कीचुहा अस्पताललाई प्रादेशिक अस्पतालका रूपमा स्तरोन्नती गर्ने बाटो खुलेको छ । नगरपालिकाले प्रदेश सरकार विरुद्ध सर्वोच्च अदालतमा दायर गरेको उत्प्रेषण रिट निवेदनमा अदालतले अन्तरिम आदेश दिन अस्वीकार गरेपछि अस्पताल स्तरोन्नती गर्ने बाटो खुलेको हो ।
स्थानीय सरकार र प्रदेश सरकारबीच लामो समय देखि विवाद रहँदै आएको अबश्थामा नगरपालिकाले चैत २४ गते सर्वोच्च अदालतमा रिट दायर गर्दै प्रदेश सरकारले गठन गरेको अस्पताल व्यवस्थापन समिति तथा सोसँग सम्बन्धित निर्णय, कामकारबाही र पत्राचार कार्यान्वयन नगर्न अन्तरिम आदेश माग गरेको थियो । साथै अस्पताल क्षेत्रमा अनावश्यक हुलहुज्जत तथा प्रचारबाजी रोक्न पनि माग गरिएको थियो ।
सोमबार न्यायाधीश सुनिल पोखरेल र नित्यानन्द पाण्डेको इजलासले उक्त निवेदन माथि अन्तरिम आदेश जारी गर्न आवश्यक नदेखिएको ठहर गर्दै आदेश दिएको हो । नगरपालिकाले सुदूरपश्चिम प्रदेशका मुख्यमन्त्री कमल बहादुर शाह, प्रदेश सरकार, सङ्घीय स्वास्थ्य तथा जनसंख्या मन्त्रालय, प्रदेशको सामाजिक विकास मन्त्रालयका मन्त्री र सचिवलाई विपक्षी बनाएर रिट दायर गरेको थियो ।
निवेदकका तर्फबाट वरिष्ठ अधिवक्ता सतिशकृष्ण खरेलर अधिवक्ता भेषराज पन्तले बहस गरेका थिए भने विपक्षीका तर्फबाट मुख्य न्यायाधिवक्ता ठेकेन्द्रराज जोशीले बहस गरेका थिए ।
सर्वोच्च अदालतको यस निर्णयसँगै लम्कीचुहा अस्पताललाई प्रादेशिक अस्पतालका रूपमा सञ्चालन गर्ने बाटो खुलेको छ । सुदूरपश्चिम प्रदेश सरकारले चालु आर्थिक वर्षमा अस्पताल स्तरोन्नतीका लागि करिब साढे चार करोड रुपैयाँ बजेट समेत विनियोजन गरिसकेको छ ।
