बैशाख ०८ धनगढी । गोदावरी नगरपालिका वडा नम्बर–३ मुक्ति टोलमा लैंङ्गिकमैत्री तथा गुणस्तरीय सार्वजनिक सेवा प्रवाह सम्बन्धी सार्वजनिक सुनुवाइ तथा सामुदायिक संवाद कार्यक्रम सम्पन्न भएको छ । युरोपियन युनियन र संयुक्त राष्ट्रसंघको आर्थिक तथा प्राविधिक सहयोगमा प्रोपब्लिक, गोदावरी नगरपालिका, सुशासन प्रवद्र्धनका लागि युवा तथा निड्स नेपालको संयुक्त आयोजनामा कार्यक्रम सम्पन्न गरिएको हो ।
सार्वजनिक सुनुवाइमा स्थानीय बासिन्दाले सार्वजनिक सेवासँग सम्बन्धित विभिन्न समस्या र जिज्ञासा प्रस्तुत गरेका थिए भने वडाका जनप्रतिनिधि तथा कर्मचारीले त्यसको जवाफ दिएका थिए । कार्यक्रममा अघिल्लो सार्वजनिक सुनुवाइमा उठाइएका विषयहरूको प्रगति समीक्षा गरिनुका साथै स्थानीयले आफ्ना समस्या र माग प्रत्यक्ष रूपमा राखेका थिए ।
कार्यक्रममा सहभागी राजमती चौधरीले कम पढेलेखेका नागरिकलाई सरकारी सेवा लिन अझै पनि कठिनाइ हुने ग रेको गुनासो गरेकी थिईन । उनले सेवा प्रवाहलाई सबैले सहज रूपमा बुझ्ने र उपयोग गर्न सक्ने बनाउनु पर्ने बताईन । साथै, छाडा चौपायाको समस्या विकराल बन्दै गएको बताउदै उनले यसको व्यवस्थापनका लागि गाईगोरुमा स्टिकर प्रणाली लागू गर्न सुझाव दिइन् ।
साहुनी चौधरीले छाडा चौपायाका कारण मुक्त कमैया शिविरमा तरकारी खेती जोगाउन कठिन भइरहेको बताइन् । त्यसैगरी पार्वती चौधरीले जनप्रतिनिधि र कर्मचारीसँग सम्पर्क गर्न समस्या हुने गरेको बताउदै फोन समेत नउठ्ने गरेको बताईन । सञ्जालकी अध्यक्ष पार्वती बोगटीले अघिल्लो वर्षको सार्वजनिक सुनुवाइमा प्रतिबद्धता जाहेर गरिएको कल्भर्ट निर्माण अझै सम्पन्न नभएको प्रति ध्यानाकर्षण गराइन् ।
कार्यक्रममा सान्ती चौधरी र मञ्जु गैरालले पनि स्थानीय समस्याबारे आफ्ना धारणा राखेकी थिईन । कार्यक्रमको सहजीकरण निड्सकी परियोजना संयोजक सरिता थापाले गरेकी थिइन् । वडा सदस्य तारा कुमारी टमटा र सचिव लोकबहादुर सोतीले सहभागीका प्रश्नहरूको जवाफ दिएका थिए ।
वडा सदस्य टमटाले प्राप्त सुझावका लागि धन्यवाद दिँदै आगामी दिनमा सुधारका लागि आफूहरू प्रतिबद्ध रहेको बताइन् । उनले जनताको सल्लाह र सुझावलाई प्राथमिकतामा राखेर काम गर्ने बताईन । मुक्ति टोलका भलमन्सा दसीराम चौधरीले टोलमा हाल १ सय ३२ घरमुक्त कमैया परिवार बसोबास गर्दै आएको बताईन ।
२०५७ सालमा बसोबासको व्यवस्था गरिए पनि हालसम्म अधिकांशले जग्गाको रातो पुर्जा नपाएको बताउदै उनले सेतो पुर्जा भए पनि त्यसले व्यवहारिक काम गर्न नसकिँएको बताए । अधिकांश परिवार अझै पनि ज्याला मजदुरीमा निर्भर रहेको बताउदै उनले टोलमा करिब ३५ परिवार पहाडी समुदायको पनि बसोबास रहेको बताए । कार्यक्रममा मुक्ति टोलका ६० भन्दा बढी स्थानीय बासिन्दाको सहभागिता रहेको बताइएको छ ।
