बैशाख ०८ धनगढी । धनगढी उपमहानगरपालिकाले सञ्चालन गरेको विशेषज्ञ वडा स्वास्थ्य क्लिनिक कार्यक्रमबाट २७ हजार ८ सय ३९ जना बिरामीले स्वास्थ्य सेवा लिएका छन् । चालु आर्थिक वर्ष २०८२÷८३ को साउन देखि चैत्र मसान्त सम्म २७ हजार ८ सय ३९ जना बिरामीले सेवा लिएका हुन ।

ग्रामीण क्षेत्रका गरिब तथा विपन्न नागरिकलाई लक्षित गर्दै सुरु गरिएको उक्त कार्यक्रमबाट उक्त अवधिमा २० हजार ८ सय ७५ जना महिला र छ हजार ९ सय ६४ जना पुरुषले निःशुल्क विशेषज्ञ सेवा लिएको कार्यक्रमका स्रोतव्यक्ति कृष्ण बोहराले जानकारी गराएका छन ।

कार्यक्रमका लागि एक जना जनरल फिजिसियन, एक जना स्त्री तथा प्रसूतिरोग विशेषज्ञ चिकित्सकका साथै गेटा आँखा अस्पताल तथा धनगढी नेत्रालयको सहकार्यमा आँखारोग विशेषज्ञबाट निःशुल्क सेवा प्रदान गरिएको ृनले जानकारी गराए । उक्त अवधिमा १६ हजार ९ सय जनाले जनरल फिजिसियनबाट, तीन हजार ७ सय १५ जना महिलाले स्त्री तथा प्रसूति रोग विशेषज्ञबाट र सात हजार २ सय २४ जनाले आँखारोग सम्बन्धी सेवा लिएको उनले बताए ।

क्लिनिकमा १८ हजार १६ जनाले प्रयोगशाला सेवा, तीन हजार ८७ जनाले इसिजी सेवा, तीन हजार ४ सय ९८ जना गर्भवतीले सेवा लिएको बताउदै उनले एक हजार ३ सय ६ जनाले अल्ट्रासाउन्ड सेवा लिएको बताए । त्यसैगरी ७० वर्षभन्दा माथिका छ हजार ४ सय ६२ जनाले सेवा लिएको उनले बताए । २०७९ साल साउनबाट सुरु गरिएको उक्त कार्यक्रम हरेक महिना १९ वटै वडामा सञ्चालन गर्ने गरिएको उनले जानकारी गराए ।