मंसिर १३ मोरङ । नेकपा एमालेको ११ औं महाधिवेशन प्रतिनिधि छनौटका क्रममा दलितमाथि विभेद गरेको पाइएको छ । प्रतिनिधि छनौटका लागि शनिबार भइरहेको मतदानका क्रममा दलित प्रतिनिधि र मतदाता माथि विभेद गरिएको पाईएको हो । दलित समुदायमाथि एमालेले संस्थागत रूपमै विभेद गरेको दलित अगुवाहरुले गुनासो गरेका छन ।
मोरङबाट ३ जना दलित प्रतिनिधि छनौटका लगी दलित मतपत्र तथा मतपेटिका छुट्टै बनाएर विभेद गरिएको हो । पूर्वराष्ट्रियसभा सदस्य खेम नेपालीले ‘पार्टीले दलितलाई झन दलित बनाएको बताए । पानी त चल्दैनथ्यो, भोट पनि नचल्ने बनाए उनले भने । दलितले दलित उम्मेदवारलाई मात्रै मत हाल्नुपर्छ, अरूलाई मत हाल्न पाउँदैनन्, अरूले पनि दलितलाई हाल्न पाउँदैनन्, यो ठूलो विभेद हो ।
प्रतिनिधि छनौटमा एमालेले भोट नचल्ने बनाएको नेपालीको गुनासो छ । ‘दलितले दलित मात्र चुन्न र चुनिन पाउने प्रावधान राखेर सामाजिक सांस्कृतिक रूपमा उपेक्षित रैथाने दलितलाई झन् साँघुरो र संकिण बनाइएको उनले बताए ।
मोरङबाट महाधिवेशन प्रतिनिधि उम्मेदवार समेत रहेका नेपालीले पार्टीले गरेको प्रावधानले दुःखी बनाएको बताउदै उनले ‘यस्तो विवेकहीन निर्णय गर्ने नेता, तिनको नेतृत्व क्षमता र विभेदजन्य व्यवहारको चर्को र उँचो शब्दमा घृणा, निन्दा र भत्र्सना गरेका छन ।
त्यसैगरीे दलित अभियन्ता समेत रहेका एमाले नेता उमेश विश्वकर्माले पार्टीले संस्थागत रुपमा विभेद गरेको बताए । दलितले दलितलाई मात्रै मत हाल्न पाउने प्रावधानले छुवाछूतलाई संस्थागत गर्ने बताउदै उनले यो एकदमै गलत भएको बताए । सामाजिक न्यायको सिद्धान्त विरुद्ध एमालेले यस्तो प्रावधान राखेको उनले बताए ।
नेकपा एमाले मोरङ सचिव सोमराज थापाले पार्टीले राखेको प्रावधानले दलितमाथि विभेद भएको स्वीकार गरेका छन । उनले ५ सय जना दलित सदस्य बराबर १ जना प्रतिनिधि पठाउने प्रावधान रहेको बताउदै खुला महिला र युवाको हकमा ८ सय बराबर १ जना प्रतिनिधि पठाउने प्रावधान रहेको बताए ।
संख्या खुकुलो बनाएर दलितका लागि प्रावधान राखिएको बताउँदै उनले दलितले दलितलाई मात्रै मतदान गर्न पाउनु विभेद जस्तो देखिने बताए । दलित प्रतिनिधिका लागि मतपत्र पनि छुट्टै भएको बताउदै उनले दलितलाई झन् विभेद गरे जस्तो देखिएको बताए ।
