शितल स्नेही,फागुन २५ बझाङ । बझाङको रोशन विकले गाउमै कुखुरा पालनबाट मनग्य आम्दानी गर्दै आएका छन् । बझाङको जयपृथ्वी नगरपालिका वडा नम्बर १० बस्ने ३० बर्षीय रोशन बि. कले गाउँमै कुखुरा पालन गरेर मनग्य आमदानी गर्दै आएका हुन । युवाहरूका प्रेरणाका स्रोत बन्दै गएका विकले आफ्नै ठाउँमा केही न केही गर्नु पर्छ र समाजका अन्य मानिसहरुले पनि व्यवसाय गरेर आत्मनिर्भर बन्न सिकोस् भने हेतुले व्यवसाय सुरु गरेको बताए ।
बझाङको सदरमुखकाम चैनपुर बस्ने रोशन बि.क विगत ५ वर्षदेखि पोल्टी व्यवसाय गर्दै आएका छन् । खुला मञ्च नजिकै रहेको चैनपुर र देवल जोड्ने झोलुगें पुलमुनि आफ्नै खेतमा पोल्टी फार्म खोलका उनले पहिलो पटक तराईबाट कुखुराका चल्लाहरु ल्याई व्यावसाय सुरु गरेको बताए । अहिले पोल्टी फार्ममा लोकल कुखुरा , गिरीराज, टर्की , लौकाट लगायतका अन्य जातीका कुखुरा र पन्छी पाल्दै आएका छन् । बि.कले बोइलर बाहेक अन्य जातीका कुखुराहरू उत्पादन तथा बिक्री वितरण गरी मनग्ये आम्दानी गदै आएको बताएका छन् ।
३ लाखको लगानीमा सुरु गरेको व्यावसाय अहिले २५ लाख सम्म पुगेको बताउदै उनले कुखुरा पालन सम्बन्धी कुनै किसिमको तालिम नलिई काम गर्दा गदै अनुभव बटुल्दै जाँदा सफल व्यवसायीको रूपमा चिनीएका छन् । रोजगारीको सिलसिलामा पहिलो पटक मलेसिया गएका उनले विदेशमा गरेको दुःख स्वदेशमै गरे स्वरोजगार हुन सकिने बताए ।
विदेशबाट फर्किए लगत्तै पोल्ट्री े व्यवसाय सुरु गरेको बताउदै विकले विदेश गएर जंगलमा काम गर्नु भन्दा आफनै देशमा उद्यम गर्नु उपयुक्त हुने बताए । अहिले आफ्नै परिवारसँगै रमाउँदै व्यवसाय गरिरहेको बताउदै उनले विदेशको दुख सम्झिदा आँखामा आँसु आउने गरेको बताए ।
सुरुमा आफू मात्रै स्वरोजगार भएको बताउदै उनले अहिले ३ जनालाई समेत रोजगार दिँदै आएको बताए ।
पहिले ११ जनाको परिवार पाल्न धौधौ हुने गरेको स्मरण गर्दै उनले अहिले निकै सहज भएकाले अन्य नयाँ काम पनि सुरु गर्न लागेको जानकारी गराए । राज्यले कृर्षिमा आत्मनिर्भरता बनाउनको लागि विभिन्न संघ संस्थाहरु र स्थानीय सरकाले कृषकलाई सहयोग गदै आएको छ । तर बझाङमा भने राजनीतिक पहुँचका आधारमा आफू निकट कार्यकर्ताहरूलाई अनुदानको रकम दिइने गरिएको छ ।
बास्तविक किसानहरुले भने अनुदान पाउन सकेका छैनन । उनीहरूका पिडा यथावत नै छन् । विदेशमा मासिक २० देखी ३० हजार सम्म तलब पाउने बि.कले आफ्नै घरमा गरेको व्यवसायबाट मासिक ४५ हजार भन्दा बढी कमाउँदै आएका छन ।
