बैशाख ०८ धनगढी । सरकारी लाफरबाहीका कारण बैतडीको मेलौलीका स्थानीय बासिन्दा ५० बर्षदेखि कर तिर्न डडेल्धुरा धाउन बाध्य भएका छन । मेलौली नगरपालिका वडा नम्बर–८ का पाँच सय भन्दा बढी घर परिवार २०३२ साल देखि जग्गाको मालपोत कर बुझाउन डडेलधुरा धाउन बाध्य भएका हुन ।
स्थानीय तहको पुनर्संरचना भए पनि समस्या समाधान हुन सकेको छैन । सरकारी टोलीको लाफर्बाहीका कारण वडासँग सम्बन्धित लालपुर्जाको श्रेस्ता डडेलधुरामै रहेकाले विशालपुर क्षेत्रका किसानले कर तिर्न, कृषि फर्म दर्ता गर्न र चारकिल्ला प्रमाणित जस्ता कामका लागि डडेलधुरा जानुपर्ने बाध्यता रहेको छ ।
चुनावमा भने स्थानीय बासिन्दाले बैतडीकै उम्मेदवारलाई मतदान गर्दै आएका छन् । वडावासीको मतदाता नामावली पनि बैतडीमै रहेको छ । तर भोट बैतडीमा दिए पनि जग्गा कर र कारोबारका लागि डडेलधुरा जानुपर्ने बाध्यता कायमै रहेको मेलौलीका युवा महेशदत्त भट्टले बताए ।
समस्या समाधानका लागि पटक–पटक प्रदेश सरकार हुँदै सङ्घीय राजधानी काठमाडौँ सम्म धाउँदा पनि सुनुवाइ नभएको उनले बताए । तल्लोस्वराड क्षेत्र अन्तर्गत मेलौली नगरपालिका वडा नम्बर–८ मा पर्ने साविक विशालपुर गाविसका ३, ४, ५ र ६ नम्बर वडाका पाँच सय भन्दा बढी घरपरिवारले हालसम्म पनि डडेलधुराको भागेश्वर गाउँपालिका वडा नम्बर–३ स्थित वडा कार्यालयमा मालपोत कर बुझाउँदै आएको वडा अध्यक्ष तपेन्द्र विष्टले जानकारी गराएका छन ।
