मंसिर १७ धनगढी । अन्तर्राष्ट्रिय अपाङ्गता दिवस विविध कार्यक्रम गरी मनाइएको छ । बुधबार“अपाङ्गता समावेशी समाजको प्रवद्र्धन ः सामाजिक उन्नतिको सम्बद्र्धन” भन्ने मूल नारा सहित धनगढीमा ३४ औँ अन्तर्राष्ट्रिय अपाङ्गता दिवस विविध कार्यक्रम गरी मनाइएको हो । शिक्षा, समावेशिता, विपद व्यवस्थापन र अपाङ्गता मानव अधिकार जस्ता महत्वपूर्ण विषयमा बहुपक्षीय अन्तरक्रिया तथा छलफल गरी अपाङ्गता दिवस मनाईएको हो ।
अपाङ्गता दिवसको अवसरमा १४ गते देखि १७ गते सम्म विभिन्न प्रतियोगिता गरिएको कार्यक्रम संयोजक नन्दराज भट्टले जानकारी गराए । बुधबार औपचारिक कार्यक्रमको आयोजनागरी प्रतियोगिताका विजेताहरुलाई पुरस्कार सहित सम्मान पत्र वितरण गरिएको उनले जानकारी गराए ।
त्यसैगरी कार्यक्रम्मा तीन जना सञ्चारकमीलाई सम्मान गरिएको छ । नेपाल टेलिभिजनका धनगढी संवाददाता तथा स्टेट सेभेनकर्मी दिनेश बिष्ट , सुदूरपश्चिम टाइम्सका सञ्चालक रमेश ऐडी र बी प्लस मिडियाकर्मी सुरज रानालाई धनगढीमा आयोजित अपाङ्ग दिवसको अवसरमा सम्मान गरिएको हो ।
सुदूरपश्चिम प्रदेश सभाका सांसद तथा सामाजिक विकास समितिका सदस्य धर्मराज पाठकले अपाङ्गता भएका व्यक्तिहरुको सम्मानजनक जीवन, सबै क्षेत्रमा पहुँच, समावेशी शिक्षा र विपदमा उनीहरूको सुरक्षा सुनिश्चित गर्न राज्य, समुदाय र संस्थाबीच सहकार्य आवश्यक रहेको बताए । आफुले पटक पटक आवाज उठाए पनि नीतिगत रुपमा अगाडी नबढेको उनले बताए ।
कार्यक्रम सफल बनाउन सहयोग गर्ने सम्पूर्ण सहयोगी संघ संस्थाहरुलाई कार्यक्रम संयोजक नन्दराज भट्टले धन्यवाद ज्ञापन गरेका थिए । त्यसैगरी कैलालीको अत्तरियामा पनि ३४ औँ अन्तर्राष्ट्रिय अपाङ्गता दिवस विविध कार्यक्रम गरी मनाइएको छ । बुधवार गोदावरी नगर स्तरीय अपाङ्ग कार्य सञ्जालले दिवसका अवसरमा प्रभात फेरी कार्यक्रम, सरसफाइ कार्यक्रम, औपचारिक कार्यक्रम गरी दिवस मनाएको हो ।
दिवसको अवसरमा बिहान सञ्जालले अत्तरियामा रहेको सुप समावेशी विद्यालयको प्राङ्गण देखि अत्तरिया चोक परिक्रमा गरेर प्रभात फेरीको आयोजना गरेको थियो । प्रभात फेरी कार्यक्रममा ‘अपाङ्गता भएका व्यक्ति माथि हुने विभेद अन्त्य गर, अपाङ्गता भएका व्यक्तिको समान सहभागिता कायम गर, अपाङ्गता भएका व्यक्तिको शिक्षा, स्वास्थ्य र रोजगारीको ग्यारेन्टी गर, अपाङ्ग मैत्री संरचना निर्माण गर लगायतका नारा लेखिएका प्लेकार्डहरु सहभागीहरुले बोकेका थिए ।
प्रभात फेरी कार्यक्रम अत्तरिया बसपार्कमा पुगेर सरसफाइ कार्यक्रममा परिणत भएको थियो । अपाङ्गता भएका व्यक्तिले पनि अरू सरह सामाजिक काममा योगदान दिन सक्छन् भन्ने सन्देश दिन सरसफाइ कार्यक्रम गरिएको सञ्जालका नगर अध्यक्ष लक्ष्मण विकले बताए । दिवसको अवसरमा सुप समावेशी स्कुलमा औपचारिक कार्यक्रमको पनि आयोजना गरिएको थियो ।
प्रदेश सांसद तुलसी देवकोटाको प्रमुख अतिथ्यतामा आयोजित कार्यक्रममा अपाङ्गता भएकाहरूको हक अधिकारका सवालमा बहस गरिनुका साथै अपाङ्गता भएका व्यक्तिको क्षेत्रमा काम गर्ने ४ जनालाई सम्मान गरिएको थियो । राष्ट्रिय अपाङ्ग महासंघ नेपाल सुदूरपश्चिम. प्रदेशका निवर्तमान अध्यक्ष, गोदावरी नगरपालिका वडा नम्बर–२ का वडा सदस्य डबल साउँद, पुस्पा रोकाया र सुप समावेशी स्कुललाई सम्मान गरिएको हो ।
अन्तर्राष्ट्रिय अपाङ्गता दिवसको पूर्वसन्ध्यामा आयोजना गरिएको २ सय मिटर ह्विलचियर दौड, हाजिरी जवाफ प्रतियोगिता, वक्तृत्वकला कार्यक्रमका विजेताहरूलाई पनि पुरस्कार वितरण गरिएको थियो भने विभिन्न सांस्कृतिक कार्यक्रमको आयोजना गरिएको थियो । दिवसको पूर्वसन्ध्यामा सञ्जालले मंगलबार साँझ दीप प्रज्वलन पनि गरेको थियो । विश्व स्वास्थ्य संगठनको आह्वानमा सन् १९९२ देखि बर्षेनी डिसेम्बर ३ मा संसारभर विश्व अपाङ्गता दिवस मनाउने गरिएको छ ।
