भदौ २५ काठमाडौँ । पूर्वप्रधान न्यायाधीश सुशीला कार्कीले नयाँ सरकारको नेतृत्व लिन जेनजी समूहले गरेको प्रस्ताव स्वीकार गरेकी छिन् । जेनजी समूहको भर्चुअल बैठकमा जेनजी समूहका सदस्य राष्ट्रविमोचन तिमल्सिना (¥यान्डम नेपाली) ले उक्त जानकारी दिएका हुन् ।
जेनजी समूहले बुधबार गरेको भर्जुअल छलफलमा सहभागी मध्ये अधिकांशले पूर्वप्रधान न्यायाधीश कार्कीलाई सरकारको नेतृत्वमा पठाउनु पर्नेमा जोड दिएका छन् ।
नेपाली सेनाले जेनजीका प्रतिनिधिलाई वार्तामा बोलाइरहँदा उनीहरूबीच विभिन्न नेताहरूका विकल्पबारे छलफल जारी रहेको थियो । भर्चुअल बैठकमा समूहका प्रतिनिधिहरूले सर्वसम्मत मानिने व्यक्ति खोज्दा कार्की सही पात्र हुन सक्ने निष्कर्ष निकालिएको तिमल्सिनाको भनाइ छ । विकल्पका रूपमा सागर ढकाललाई राखिएको छ ।
ढकालले अरू कोही अगाडि नबढेमा आफू तयार रहेको बताएका छन् । यस अघी जेनजीहरूको खुला बैठकमा सहभागी ७ हजार भन्दा बढी मतदाताहरू मध्ये ४० प्रतिशत भन्दा बढी कार्कीको नाममा सहमत भएको बताइएको थियो ।
करिब ५ घन्टा भन्दा लामो बैठक पछि जेनजीहरू सुशीला कार्कीको साझा नाम लिएर राष्ट्रपति रामचन्द्र पौडेलसँग वार्तामा जाने भएका हुन् । उनीहरूले प्रारम्भिक १० वटा नामहरू मध्ये सुशीला कार्कीको नाममा मतदानद्वारा सहमति गरेको बताईएको छ ।
यसअघि सेनाले पनि उनलाई सम्पर्क गरेर अन्तरिम सरकार प्रमुख बन्नेबारे छलफल गरेको सैनिक स्रोतले बताएको छ ।
