फागुन १२ धनगढी । कैलालीको सिमसार क्षेत्रमा यस वर्ष ५९ प्रजातिका दुई हजार ५ सय २२ वटा जलपन्छीको अभिलेख राखिएको छ । हिउँदमा गरिएको गणनाको क्रममा उक्त सङ्ख्यामा जलपन्छीको अभिलेख राखिएको हो ।
रैथाने र आगन्तुक जलपन्छीको सङ्ख्या, अवस्था, प्रजाति पत्ता लगाउनका लागि गत जनवरीमा विभिन्न तालतलैयामा जलपन्छीको गणना गरिएको थियो । गणनाको क्रममा विश्व रामसार क्षेत्रमा सूचीकृत नेपालको पहिलो चरा आरक्ष घोडाघोडी तालमा ३५ प्रजातिका एक हजार ४ सय ९७ जलपन्छीको अभिलेख राखिएको हो ।
त्यसैगरी, धनगढी उपमहानगरपालिकामा रहेको जाखोर तालमा १७ प्रजातिका ४ सय ५८ जलपन्छीको अभिलेख राखिएको छ । कैलाली र बर्दियाको सीमा क्षेत्रस्थित कर्णाली नदीको तल्लो तटीय क्षेत्रमा विभिन्न २८ प्रजातिका ५ सय ५४ वटा जलपन्छीको अभिलेख राखिएको छ ।
वसन्ता वन क्षेत्रमा पर्ने रखौना, लौकाभौका, सोनियाँ रुपियाँ, घोडताल, रप्ताही लगायतका तालमा पनि पानी चराको गणना गरिएको थियो । बसन्ता वन क्षेत्रमा रहेका तालहरुमा जलपन्छीको सङ्ख्या निकै घटेको पाइएको चराविद् हिरुलाल डङ्गौराले बताए । चराको प्राकृतिक वासस्थानको विनाश, मानवीय हस्तक्षेप लगायतका कारण जलपन्छीको सङ्ख्या घट्दै गएको उनले बताए ।
जाडो छल्नका लागि उत्तरी ध्रुवबाट सिमसारमा विभिन्न प्रजातिका पाहुना जलपन्छी पुगेको बेला हरेक वर्ष जलपन्छीको गणना गर्ने गरिदै आएको उनले बताए । कैलालीको सिमसारमा सिलसिले हाँस, नादुन हाँस, मरुल, डुबुल्की चरा, हरिहाँस, कैले टाउके हाँस, जलेवा, जलअप्सरा, बगाले सिमकुखुरा, हरिहाँस लगायतका रैथाने र आगन्तुक जलपन्छी पाइने गरेको उनले बताए ।
