भदौ १४ बाजुरा । बाजुराका अधिकाशं किसानहरुले व्यावसायिक रुपमा फलफूल खेती गर्दै आएका छन । बाजुराका किसानहरुले स्याउ , सुन्तला , किवी , आँप , ओखर, कागती लगायतका फलफूल खेतीलाई व्यावसायिक रुपमा गर्दै आएका हुन । फलफुल खेतीमा सम्भाना देखे पछि उनीहरुले फलफुल खेतीलाई व्यावसायीक रुपमा गर्दै आएका हुन । कृषि ज्ञान केन्द्र बाजुराका अनुसार स्याउँ खेतीका लागि बाजुराको माटो र हावापानी राम्रो भएकाले किसानहरु फलफूल खेतीतर्फ आकर्षित् बन्दै गएका हुन ।
स्वामिकार्तिक खापर गाउँपालिका वडा नम्बर–१ जोरुका स्याउ किसान धनबहादुर रावतले पहिला स्थानीय जातको मात्र स्याउ उत्पादन हुने गरेको बताउदै कृषि ज्ञान केन्द्रले साइबेरियामा उत्पादन हुने गरेको गोल्डेन गाला , फुँजी स्याउको बोट मनाङगबाट ल्याएर रोप्न सुरु गरेसँगै अहिले बाजुरामा नयाँ जातको स्याउ पनि उत्पादन हुन थालेको जानकारी गराए । बाजुरामा नयाँ जातको स्याउ राम्रो उत्पादन हुने गरेको उनले बताए ।
बाजुरामा स्याउ राम्रो उत्पादन हुन थालेपछि आफुले यसलाई व्यवसायको रुपमा लिन थालेको किसान रावतले बताए । स्याउ खेती गर्दा जिविकोपार्जनमा सहज हुने देखेर झण्डै सात सय रोपनीमा स्याउ खेती गरेको उनले जानकारी गराए । स्याउ यती बेला राम्रोसँग फलेको उनले जानकारी गराए । स्याउ , सुन्ताला आँप , ओखर र कागती लगायतका फलफुललाई स्थानीय सरकारले बजार सम्म बिक्री गर्नका लागि अनुदानको व्यवस्था गर्दै आए पछि अहिले किसान फलफुल खेती व्यावसायमा लाग्न थालेको रावतले बताए ।
स्याउ खेतीका लागि स्वामिकार्तिक खापर गाउँपालिकाको माटो तथा हावापानी राम्रो भएकाले किसानलाई स्याउ खेतीतर्फ आकृषित गर्दै आएको अध्यक्ष भरतबहादुर रोकायाले बताए । गाउँपालिकाले बाँझो रहेको जमिनमा पनि स्याउँ खेती गर्ने अभियान सुरु गरेको जानकारी गराउदै उनले त्यसका लागि किसानलाई नयाँ जातको स्याउको बिरुवा दिने गरेको बताए ।
फलफुल खेतीका बारेमा अधिकाशं किसानलाई केही जानकारी नहुँदा स्याउ कम उत्पादन हुने गरेको अध्यक्ष रोकायाले बताए । किसानले उत्पादन गरेका स्याउ गाउँपालिकाले देशका विभिन्न ठाउँमा बिक्री गर्न ढुवानी अनुदानको सहयोग गर्दै आएपछि किसानले स्याउ खेतीलाई व्यावसायीक रुपमा गर्दै आएको स्वामिकार्तिक खापर गाउँपालिकाका अध्यक्ष रोकायाले जानकारी गराए ।
हिमाली, स्वामिकार्तिक, जगनाथ, बुढीनन्दा लगायतका स्थानमा उत्पादन हुने गरेको स्याउ अहिले बडिमालिका , गौमुल र खप्तड छेडेदहमा पनि हुने गरेको उनले जानकारी गराए । बाजुरामा ३ सय ७० हेक्टर क्षेत्रफलमा एक हजार २० मेट्रिक्टन स्याउ उत्पादन हुने गरेको कृषि ज्ञान केन्द्र बाजुराले जानकारी गराएको छ ।
